Aero Dili: Aviaun ne’ebé liga Timor-Leste ba mundu ho bandeira RDTL

banner 120x600
1,077 Views

G—NEWS (DILI) — Aero Dili, kompañia aérea nasionál Timor-Leste nian, oras ne’e hahú semo ba rai-liur, hodi loke dalan internasionál sira ne’ebé liga Timor-Leste ho nasaun viziñu sira iha Sudeste Aziátiku no kontinente seluk-tán. Ho bandeira Repúblika Demokrátika Timor-Leste (RDTL) iha aviaun nia ikun, Aero Dili hanesan símbolu orgullu nasaun nian iha lalehan internasionál.

Liuhusi voo internasionál, Aero Dili mós introdús Timor-Leste ba mundu. Semo ida-idak lori ho nia misaun importante ida: atu introdús beleza ekonómika, kulturál no naturál Timor-Leste nian, nasaun ida ne’ebé kontinua dezenvolve hafoin hetan independénsia.

banner 325x300

Bandeira RDTL ne’ebé dada iha aviaun nia leten nu’udar sinál identidade no orgullu nasionál. Ho rota foun ida-idak ne’ebé loke, Aero Dili halo kontribuisaun loloos ba promosaun turizmu, diplomasia no relasaun internasionál Timor-Leste nian. Ida-ne’e maka pasu estratéjiku ida atu hasa’e konetividade globál no loke oportunidade foun sira ba komérsiu no investimentu.

 

“Ba ne’ebé tuir mai? Ho Aero Dili, mundu mak imi nia halimar fatin! Mai ita halo ita-boot nia aventura tuirmai sai ida ne’ebé ita sei hanoin”. sita iha pájina facebook Aero Dili nian.

 

La’ós de’it kompañia aérea, Aero Dili nu’udar embaixadór ida ne’ebé lori espíritu progresu no orgullu povu Timor-Leste nian. Voo ida-idak la’ós de’it kona-ba viajen fíziku, maibé mós kona-ba lori mundu besik liután ba nasaun ida ne’ebé riku ho istória no potensiál. Nu’udar kompañia aérea ne’ebé liga Timor-Leste ho mundu esternu, Aero Dili hasa’e bandeira nasaun nian iha lalehan internasionál, fó imajen ida kona-ba nasaun ida ne’ebé buras no transforma iha palku mundiál.

 

Aero Dili Realiza Formasaun Disiplina no Komunikasaun

 

Aero Dili, kompañia aérea nasionál Timor-Leste nian, foin lalais ne’e hala’o formasaun interna hodi hasa’e dixiplina no abilidade komunikasaun entre nia funsionáriu sira. Treinamentu ne’e ho objetivu atu haforsa dezempeñu ekipa nian no hadi’a koordenasaun entre departamentu sira, ne’ebé sai xave atu hasa’e kualidade servisu kompañia aérea nian.

Treinamentu ne’e kobre área importante rua: dixiplina serbisu no komunikasaun ne’ebé efetivu. Partisipante sira hetan komprensaun klean kona-ba oinsá dixiplina iha hala’o knaar sira bele hasa’e produtividade no satisfasaun kliente nian. Aleinde ne’e, komunikasaun di’ak mós hetan énfaze nu’udar fundasaun ida atu hamenus komunikasaun ne’ebé laloos no hadi’a serbisu iha ekipa.

“Ami nia ekipa kabine inisial Aero Dili foin termina sesaun treinamentu konaba “Social Grace”. Sesaun ne orienta husi espesialistas, Sra. Pungky Purwaningsih no Sra. Silvana Latumeten, formasaun nee kobre étika, komunikasaun no konsiénsia kulturál. Formasaun importante ida nee garante katak ita nia ita nia ekipa inkorpora excelensia iha servisu, profisionalismo, no respeitu kulturál. Kontinua ligadu ho ami enkuantu ami prepara atu simu ita abordo!”, sita iha pájina facebook Aero Dili nian.

Aero Dili hein katak liuhusi formasaun ne’e, kualidade servisu kompañia aérea nian bele kontinua hasa’e, no relasaun entre kolega no pasajeiru sira bele sólidu no harmonia liután.

Momentu Aero Dili ho Papa-Francisco

Iha loron 11 fulan-Setembru tinan 2024, Papa Francisco kontinua nia viajen apostóliku husi Timor-Leste ba Singapura ho aviaun Aero Dili. Amu-Papa nia vizita mai Timor-Leste, ne’ebé hala’o iha loron 9 to’o 11 fulan-Setembru, nu’udar momentu istóriku no signifikativu ba povu timoroan. Ho Aero Dili lori nia ba lalehan internasionál, vizita ne’e la’ós de’it hametin lasu espirituál sira, maibé mós introdús Timor-Leste ba mundu nu’udar nasaun ne’ebé ema haree no respeita iha palku globál. Obrigadu, Papa Francisco, ba vizita ne’ebé lori dame no esperansa foun ba povu Timor-Leste.

Nu’udar parte husi viajen signifikativu ida ne’e, Aero Dili sente orgullu hodi akompaña Papa Francisco, símbolu viajen espirituál ne’ebé liga mundu ho Timor-Leste.

Obrigadu, Papa Francisco, ba vizita bensaun no inspiradora ida. Mai ita hein katak ninia vizita sei lori ksolok no esperansa foun ba povu Timor-Leste tomak.

Adeus, Amu-Papa Francisco, atu dame no bensaun akompaña nafatin Ita-nia hakat sira.

Aero Dili foin atinji marku importante ida iha nia istoria dezenvolvimentu

Iha momentu importante seluk-tán, Aero Dili foin atinji marku importante ida iha nia istoria dezenvolvimentu. Kompañia aérea nasionál Timor-Leste nian ho susesu simu ona Sertifikadu Rejistu ba nia aviaun Airbus A319 daruak hosi autoridade aviasaun, AACTL (Autoridade Nasionál da Aviasaun Sivíl de Timor-Leste). Realizasaun ida ne’e marka hakat signifikativu ida ba oin iha esforsu Aero Dili nian atu habelar nia alkanse servisu voo nian, loke oportunidade foun no liga liután Timor-Leste ho mundu.

Aviaun Airbus A319 daruak ne’e, ho ninia kapasidade ne’ebé boot liu no efisiénsia ne’ebé aas liu, sei hametin Aero Dili nia frota iha atendimentu ba rota doméstika no internasionál sira. Ho adisaun aviaun ida ne’e, Aero Dili bele hasa’e beibeik frekuénsia semo no hatán ba ezijénsia viajen ne’ebé aumenta, tantu husi pasajeiru lokál no internasionál.

“Aero Dili simu ho susesu Sertifikadu Rejistu ba aviaun Airbus A319 daruak hosi AACTL. Milestone signifikativu ida ne’e marka pasu importante ida ba oin hodi habelar ami nia servisu.

Kontinua atu hetan atualização kona ba ami nia rota no promosaun foun sira”. sita iha pájina facebook Aero Dili nian.

Etapa ida ne’e nu’udar prova ba Aero Dili nia kompromisu atu kontinua halo inovasaun no fornese atendimentu ne’ebé di’ak liu ba kliente sira. Aleinde habelar nia frota, kompañia aérea ne’e mós planeia atu aumenta rota foun sira voo nian ne’ebé variadu liu, no mós oferese promosaun sira ne’ebé atrativu hodi fasilita asesu ba destinu oioin.

Aero Dili konvida ita-boot sira atu atualiza nafatin ho informasaun sira ne’ebé ikus liu kona-ba abertura rota foun sira, no mós oferta promosionál sira ne’ebé bele goza hosi nia kliente fiel sira. Ho pasu ida ne’e, Aero Dili hametin liu tan ninia pozisaun nu’udar ligasaun importante ba Timor-Leste ho mundu internasionál.

Editor Testu: Amito Qonusere Araújo

relavante