Jornalísta : Arménio //
G-RTV.com (Manatutu) : Partidu CNRT liu husi Sekretáriu Jerál Francisco Kalbuadi Lay hala’o abertura bá konsolidasaun nível munisipál hodi konsolida forsa bá eleisaun parlamentár ne’ebé sei mai, iha munisípiu Manatutu-Villa, Dominggo, 10/07/2022.
Iha abertura konsolidasaun ne’e, CNRT aproveita agradese bá apoiu votu 20 mill resin husi sidadaun eleitór (Povu), militante, apoiante, movimentu inklui aliadu polítiku iha Manatutu ne’ebé fó sussesu no vitória ba kandidatu José Ramos-Horta iha eleisaun prezidensiál (ELPREZ) 2022.
‘’Bá povu tomak, fiskais sira, tuir mai selkom, nurep, esrutura munisipál, Ekipa task-force, organizasaun afiliadu partidu, movimentu, partidu polítiku tambá ita bo’ot sira, ohin ha’u hamri’ik iha ne’e lori Maun-Bo’ot Kay Rala Xanana Gusmão nia naran hakarak agradese ba ita bo’ot sira liu-liu tamba ita bo’ot sira nia esforsu no dedikasaun tomak mak ohin ita lori duni ita nia kandidatu ba Prezidente Repúblika,’’ Deklara SEKJE CNRT Francisco Kalbuadi Lay, iha abertura konsolidasaun munisipál Manatutu, ne’ebé hala’o iha Sede partidu munisípiu, Dominggo, 10/07/2022.
Eis-deputadu husi partidu FRETILIN ne’e afirma tan, ‘’Partidu ne’e sempre tau-ás sentidu estadu, liu-liu interese nasionál, ohin loron mundu tomak sofre ba Covid-19 ne’ebé seidauk rekoperadu iha area hotu, tambá ne’e ita tenke konsolida, hametin estrutura hodi hasoru eleisaun parlamentár 2023,’’ Afirma nia.
Iha Fatin hanesan, koordenadór jerál partidu CNRT munisípiu Manatutu, Marcos Dos Reis Cunha, ho matan-wen reforsa tan, Ramos-Horta ita lori ona bá Prezidente Repúblika (PR), agora tenke lori Xanana Gusmão ba Primeiru Ministru iha eleisaun parlamentár 2023.
‘’Horta ita lori ona ba PR, se aban-bairua lakohi hili Xanana ba Primeiru Ministru sei iha arrependimentu, tambá agora ne’e oportunidade diák liu maske ema bele hanesan (líder) maibé karrekter la hanesan, tenke aproveita nia (Xanana) di’ák bainhira sei bele hala’o servisu hodi dezenvolve Timor Leste,’’ Reforsa Marcos.
Entretantu, Partisipa iha eventu partidaria ne’e, mai husi estrutura nasionál to’o baze, organizasaun afiliadu partidu, reprezentante partidu aliadu inklui movimentu sira ne’ebé foin lalais ne’e apoiu CNRT nia kandidatu iha ELPREZ 2022.
Ho atividade hanesan iha loron ne’ebé hanesan, komitiva husi estrutura partidu CNRT nasionál kontinua hala’o iha postu-administrativu Vemasse, munisípiu Baucau.
(REMATA).
loading="lazy" />