Inséndiu iha eis-merkadu komoro, komunidade barak lakon uma

G-RTV.Com (Dili):  Akontesimentu ahi-han uma (Inséndiu) komunidade iha Eis-Merkadu Komoro  kinta-feira madrugada (29/07), ne’ebé rezulta uma kuaze uma 50 resin estragus totál.

Tuir vítima husi insédiu ne’e, Simão Hornay, informa bá G-RTV.Com iha fatin akontesimentu, katak, ho hakfodak hader mai, ahi hahu han vizinhu sira nia uma, nune’e sira salva-an de’it.

‘’Ami hakfodak, hader mai , ahi hahu han uma vizinhu sira nian, óras tuku 4 madrugada, nune’e ha’u ho ha’u nia família,salva-an de’it, uma no sasan uma laran, estragus totál’’. Hateten vítima iha fatin akontesimentu aldeia 03, suku Fatuhada, postu D. Alexo, Munisípiu Dili.

Vítima ne’e esklarese liu tan, seidauk hatene kauza husi inséndiu ne’e maibé hatene de’it mak ahi-han komesa husi parte oeste nian nune akompña ho anin, to’o afeta komunidade sira seluk.

‘’Ami seida’uk hatene kauza husi akontesimentu ne’e, maibé iha parte diresaun ba Oeste nian mak hahu ahi-lakan, nune’e anin lori ahi ne’e komesa bo’ot  hodi afeta ba ami hotu’’. Esklarese Simão ne’ebé durante ne’e hala’o nia kna’ar hanesan motorista Bus.

Hanesan motorista, Nia husu ba parte kompetente atu rezolve imediata vítima inséndiu sira tambá durante serka sanitária, sira nia rendimentu menus.

Iha fatin hanesan, ekipa Bombeiros ne’ebé halo atua insénsiu ne’e klarifika, sira simu informasaun iha tuku 4:20 ÓTL, madrugada (ÓTL), liu de’it minutu 10, ekipa to’o iha fatin akontesimentu, ahi nia eskala hahu bo’ot ona.

‘’Ami simu informasaun iha tuku 4:20 madrugada (ÓTL) no hafoin liu minutu 10, bainhira ekipa to’o, ahi nia eskala hahu  bo’ot ona’’. Klarifika membru husi ekipa Bombeiros, Pascoál Pereira vieigas.

Membru Bombeirus ne’e, hatutan, bainhira ekipa to’o salva uluk mak komunidade afetadu sira, konsege salva de’it sasan balun.

‘’Bainhira ami to’o, salva uluk komunidade ne’ebé hela besik inséndiu ne’e, sasan balun ami salva no balun la’e’’. hatutan fontes ne’e.

Tuir observasaun G-RTV.com iha terrenu, uma-kain sira ne’ebé afetadu, kuaze la salva sira nia sasan báziku (uma, ropa, ekipamentu ba tein, hahan), salva-an ho de’it ropa ne’ebé hatais no ho inséndiu ne’e halo trauma bá komunidade afetadu inklui labarik ho idede 0-5.

Jornalista : Arménio.