G-NEWS (MUNISIPAL) – Sekretária Estadu Komunikasaun Sosiál Mericio Juvenal Akara, hala’o kampanha Nasioná Kombate Hoax no Promove Internet Saudável liuhosi Sensibilizasaun Literásia Dijital, ba estudante nivel Sekundária sira iha Munisípiu Aileu, Ermera no Liquiça.
Objetivu hosi kampanha ne’e fahe informasaun ba estudante sira, nu’udar jerasaun kontinuador atu hatene utilizasaun internet ho plataforma dijital, no kombate informasaun falsa sira ne’ebé la kontribui ba kapasidade no konhesimentu pozitivu ba estudante sira.
Durante kampanha tama sai eskola sira, estudante nivel Sekundária sira, antusiasmu hodi akompanha kampanha Nasionál ne’e, ne’ebé akompanha hosi edukadór sira. Sekretária Estadu Komunikasaun Sosiá Mericio Juvenal Akara motiva no enkoraja estudante sira atu utiliza internet ho saúdavel iha plataforma dijital. Iha era dijitalizasaun, informasaun, siénsia no imajen hotu-hotu públika iha plataforma dijital hanesan Facebook, Instagram, Tik Tok no plataforma seluk, ne’ebé domína sosiedade tomak. Tanba ne’e sidadaun hotu-hotu ne’ebé utiliza plataforma dijital tenke ho kuidadu, no buka informasaun pozitivu, nune’e labele konsume informasaun falsa sira.
Matéria kampanha hosi SECOMS sai hanesan matéria importante ba estudante sira, tanba maiória estudante sira mak utiliza plataforma dijital, iba ne’ebé estudante balun mós sei konsume informasaun falsa sira, tanba sira seidauk komprende didiak kona-ba impaktu negativu kona-ba utilizasaun plataforma dijital.
Bainhira G-News dadalia ho estudante sira, sira rasik informa katak, sira balun sai vítima ba utilizasaun plataforma Dijital, liuhosi Smartphone ka Telefone Matenek.
Telefone Matenek signifika bele uza internet hodi asesu informasaun saída deit, iha rai laran no rai liur, maibé tenke uza ho saúdavel.
Iha kampanha Nasionál ne’e, SECOMS mós konvida instituisaun relevante sira hanesan Konsellu Imprensa Timor Leste, no Plan Internasionál, nune’e instituisaun hirak ne’e bele transmite informasaum kona-ba kauza sira hosi Plataforma dijital, iha Timor Leste, no utentes plataforma dijital ne’ebé sai mós vítima ba teknólojia modernu ne’e.
Kampanha ne’ebé SECOMS hala’o, hanesan meiu ida atu fahe siensia ho edukativu, transformadu ba estudante sira, nu’udar jerasaun futuru nasaun nian, ne’ebé konsume informasaun pozitivu sira, duke asesu informasaum Hoax ne’ebé bele kontribui ba instabilidade seguransa, defamasaun, no impaktu negativu seluk, ne’ebé la fó benefísiu ba sidadaun sira.
Maske kampanha Nasionál Kombate Hoax, hala’o deit durante oras lima nia laran iha kada eskola sira, maibé tuir Observasaun G-News katak, Estudante sira sente triste tanba tempu limitadu, no sira husu atu kontinua programa ne’e nafatin ba estudante sira seluk ne’ebé la partisipa, joven sira, autoridade komunitáriu, nune’e populasaun sira labele sai vítima ba plataforma dijital ne’e.
Tanba matéria Kombate Hoax importante, halo estudante sira preokupa no iha interese tebes atu hamosu matéria ida kona-ba Kombate Hoax no Plataforma Dijital, iha eskola sira. BainhriaG-News husubestudante sira kona-ba matéria ne’ebé SECOMS no oradór seluk aprezenta, estudante sira dehan oradór sira hanesan mestre.
“Ohin Sua Exelênsia SECOMS koalia ne’e, ami hanoin kala Nia mestre. Entaun ohin ami konfirma kolega sira, mais sira dehan lae, Nia hanesan Sekretária Estadu Komunikasaun Sosiál. Tanba ninia aprezentasaun hanesan mestre sira, ami komprende lalais. Enkuantu oradór seluk mós diak, sira hanesan ami nia mestre sira”, hateten Estudante sira.
SECOMS promete, programa ne’e sei kontinua hala’o nafatin ba estudante Sekundária no Universitáriu sira iha nível Munisípal to’o Nasionál.
Jornalista : Ekipa G-News
Editór Testu : Amito Qonusere Araújo
loading="lazy" />