G-NEWS (DILI) – Governu apoiu orsamentu miliaun 2 pontu 5 dollares amerikanu ba Organizasaun Arte Marsiais no Organizasaun Federativu hamutuk 17. Serimónia ne’e hala’o liuhosi lansamentu iha GMT, Dili, Kinta-feira (13042023).
Prezidente KRAM.IP Fernando António da Costa, Kinta-Feira ne’e ba G-News informa, apoiu finansiamentu ne’e ho objetivu atu halo jestaun Sekretariadu Organismu, resensiamentu ba Membru no programa prioridade seluk tán.
Prezidente KRAM ne’e esplika tán, Governu ida ne’e tau 2.5 milioens ba apoiu Dezenvolvimentu Organizasaun Artes Marsiais. Fundo ne’e fahe proporsionalmente ba OAM hamutuk 17, OAM Federativu 10, Organizasaun Salurik Silat nian ida (FESTIL) no Organizasaun Silat 6. Hosi Organizasaun 17 ne’e OAM tolu (IKS, PSHT, KORK) mak hetan fundu boot liu hamutuk $300 ital mil. Sira hetan boot liu tanba iha komplexidade problema mak sira hasoru, membru barak liu, no dezenvolvimentu tarde liu.
“Utilizasaun fundu tuir regras finansiamentu fundu subvensaun públikú Governu nian. KRAM hahú ho halo audiensia ho OAM sira hotu, esplika kona ba objetivu, kritériu asesu ba fundu nian ba sira. Depois hahú halo audiensia ho kada organizasaun ho diskuti sira nia planu no orsamentasaun”, Nia esplika.
Hafoin ida ne’e asina akordu servisu hamutuk (ASH). Tuir Fernando katak, prosesu sira ne’e hotu kompletu ona no ohin lansa tiha ona ba públiku iha GMT. La kleur tan OAM ida-idak sei hetan transferênsia orsamentu iha sira nia konta bankária. Fundu ida fo apoio ba komponente 5 (Jestaun Sekretariadu OAM, Resensiamentu ba Membru, Formasaun ba Treinadores, Kampionatu, no Harii ka rehabilita sede).
Apoio ne’e sei implementa durante tinan 4 nia laran. Bainhira OAM sira hahú hatudu kapasidade jestaun, no dezenvolve organizasaun no membru sira, KRAM sei hases-an no husik sira lao mesak, tanba KRAM labele existe para sempre. KRAM iha atu regula deit bainhira OAM bele regula nia an, ka bele regula hosi nia Federasaun no nia organizasaun inan sira, no posibilidade KRAM la presija existe ona.
Jornalista : Ekipa G-News
Editór Testu : Amito Qonusere Araújo
loading="lazy" />