G-NEWS (DILI) – Organizasaun Arte Marsiais (OAM) sira hala’o deklarasaun dame (paktu dame) hodi kolabora no kontribui ba dame durante prosesu kampaña no Eleisaun Parlamentar ne’ebé nakonu ho ambiente paz no seguru.
Segundu Komandante Jeral PNTL Komisariu Polisia Pedro Belo hateten deklarasaun dame ne’ebe maka sira halo no entrega ba PNTL hanesan baze ida ne’ebe maka PNTL kaer metin karik loron ikus maka sira halo problema maka ida ne’e mos hanesan provas ida atu ami bele halo investigasaun ba sira, Nia hato’o asuntu ne’e ba Jornalista sira iha GMT Dili, kinta (13/04).
Nia hatutan maioria Prezidente Organizasaun Artes Marsiais sira asina deklarasaun ne’e nune’e karik iha buat ruma ne’ebe maka mosu ami sei bolu sira nia Prezidente hodi husu sira nia responsabilidade tanba sira rasik maka asina deklarasaun dame nian no entrega ba PNTL.
Ligadu ho Grupu Artes Rituais ne’ebe maka la partisipa iha deklarasaun paktu dame ne’e, Segundu Komandante Jeral PNTL hateten Ami sei bolu ketak Arte Rituais sira atu bele hamutuk hola parte hodi halo servisu hamutuk ho PNTL liu-liu ba área seguransa nian hodi nune’e ita hotu bele asegura prosesu kampaña ne’ebé maka sei hahú iha loron 19 fulan Abril, no Eleisaun Parlamentar iha loron 21 maiu.
“Ami sei haruka Ami nia ekipa ba buka sira nia kordenador atu nune’e iha tempu besik ami bele hasoru malu atu husu sira nia kontribusaun ba estabilidade,” dehan Komisariu.
Antes ne’e iha loron 11/04 Komandu PNTL halao ona enkontru iha Kuartel Jerál momentu ne’e Prezidente OAM hamutuk nain 15 mak partisipa no Komandu husu nafatin atu sira kolabora ho PNTL, no nia kontinuasaun maka deklarasaun dame ne’ebe halao ohin (13/04) iha GMT hanesan istória ida Prezidente artes Marsiais hotu-hotu hamutuk 17 ne’ebé maka asina ona deklarasaun ida ne’e atu servisu hamutuk ho PNTL hodi asegura Eleisaun Parlamentar ne’e bele lao ho diak no hau fiar katak sira hamutuk sei la mosu problema no bainhira sira halo problema maka sira sei simu nia konsekuensia tuir prosesu legal ne’ebé maka iha.
Diretór Ezekutivu IKS PTL Kera Sakti Timor Leste Samuel Guterres, ba G-News, Kinta-Feira(13042023) esplika, Organizasaun Kera Sakti hasai ona mensajen ba membru tomak iha territóriu nasionál atu kontribui ba paz no estabilidade, liuhusi sirkular organizasaun nian.
“Organizasaun IKS PTL Kera Sakti Timor Leste fo kontribusaun masimu husi asaun nebe ami halo liu husi mensajen ba membru sira hotu, no ami mos hasai ona sirkular No.ref 03 /DN.IKS.PTL/III/2023, iha sirkular ne’e ami fó sai mensajen klaru ba membru IKS PTL Kera Sakti Iha territóriu Timor laran tomak, no membru sira ne’ebé iha diaspóra, tenke kumpre regras ne’ebé mensiona iha sirkular laran”, Samuel esplika tuir sirkular Organizasaun nian.
Iha okajiaun ne’e, Prezidente Persaudaraan Setia Hati Terate (PSHT) Baltazar Lemos Seixas husu ba nia membru sira atu iha konsiênsia hodi mantein paz no estabilidade iha Eleisaun Parlamentár ne’ebé sei hala’o iha loron 21 maiu.
“Membru hotu tau iha konsiênsia atu mantein paz iha nasaun ida ne’e tanba paz mai husi ita ida-idak nia an rasik, kriasaun paz inportante durante Kampaña no Eleisaun Parlamentar tanba ne’e tenke evita labele halo problema,” Nia apela.
Iha fatin hanesan, Prezidente Komisaun Nasional Eleisaun (CNE-sigla portuges) José Agostinho Belo husu ba membru OAM sira wainhira iha tempu kampanha tenki kria estabilidade atu nu’une labele mosu problema ou dezeintendementu ba malu.
“Nafatin kria unidade no paz atu nu’une ita nia elisaun ida ne’e bele lao ho diak, tanba ne’e ita sira ne’e hamutuk fo liberdade ba sidadaun sira hotu, no ita bo’ot sira mós tenki iha partisipasaun ba elisaun jeral ne’ebé atu mai,” dehan Belo.
Jornalista : Ekipa G-News / Média PNTL
Editór Testu : Amito Qonusere Araújo
loading="lazy" />