Asaun AMN Hakarak Halakon Lei Pensaun Vitalisia Tanba Habokur De’it Ukun Na’in Sira

G-NEWS (DILI)-Segunda-Feira ne’e (21/11/2022) Aliansa Maubere Nasional (AMN) halo asaun manifestasaun hasoru Deputadu sira iha resintu UNTL nia oin hodi manifesta sira nia ejijensia ba Parlamentu  Nasional atu kansela sosa kareta Pajero, Laptop no halakon Lei Pensaun Vitalisia tanba sira konsidera ne’e injustisa Sosiál iha Timor-Leste

Kordenador Jerál AMN Gaspar Maugamu husu ba Primeiru Ministru Taur Matan Ruak atu halakon lei Pensaun Vitalisia tanba nia rasik promente bainhira iha kampaña tinan hirak liu ba, promete ba povu katak sei halakon Lei Pensaun Vitalisia maibé bainhira mai ka’er ukun tiha la sai realidade tanba ne’e AMN hodi halo asaun atu ejiji ba Governu no Parlamentu Nasional hodi halakon tiha Lei Pensaun Vitalisia ne’e, tanba ema balun de’it mak hetan benefisiu, nomós lakonkorda ho lei numeru 1/2006 ne’ebé ko’alia kona-ba reuniaun públiku no manfestasun tenke ho distansia 100 metrus

“ami la konkorda tebes ho deputadu sira ne’ebe halo lei númeru 1/2006 ne’ebé ho artigu 5 sira ko’alia kona-ba manifestasaun tenke distansia 100 metrus, inklui lakonkorda ho lei pensaun vitalisia tanba Primeiru Ministru Taur Matan Ruak, nia rasik mak iha kampaña hateten atu altera tiha lei ida ne’e tanba ne’e mak ema barak tebes halo apresia ba nia iha momentu ne’ebá maibé to’o agora mandatu atu hotu ona mas la iha realidade tanba ne’e ami ejiji ba nia para tau atensaun ba ida ne’e tanba nia rasik mak promete iha eleisaun tinan hirak liu ba”Dehan nia

Presidente Parlamentu Nasional konkorda ona atu halo dialogo ho representante AMN ne’ebé submete ona karta iha semana kotuk tanba ne’e  aban sira sei halo asaun monok hodi lori de’it espanduk no sei la halo barulho tan, sekarik iha diologo ne’e mak la iha solusaun, mak AMN sei kontinua nafatin manisfestasaun hodi hasoru Parlamentu nasional to’o fulan Dezembru oin tanba karta manifesatasaun nia durasaun to’o fulan rua.

AMN mai husi estudante Univestiriu sira ne’ebé kontra injustisa Sosiál tanba makaer ukun sira ladun tau importansia ba seitor Agrikultor, Edukasaun, Saúde, no área seluk tan ne’ebe importante atu bele hadia povu nia moris maibe hakarak hariku deit grupu balun nia moris no ladun tau inetrese ba seitor sira ne’ebe mensiona iha leten  tanba ne’e AMN konsidera halo diskriminasaun atu fó benefisiu de’it ba grupu balun hodi habokur sira nia an no AMN sei kontinua kontra injustisa Sosial sira ne’e.

Jornalista: Teotónio Alves Pinto

Editor : Amito Qonusere Araujo