G-RTV News (21/04/2021): Relasiona ho Inundasaun no Serka Sanitária iha Kapitál Timor Leste, Movimentu Atoni Oekusse-Oan hakarak fila ba RAEOA/ ZEEMS atu kore-an husi susar ne’ebé sira hasoru.
Iha prossesu administrativa atu transporta Atoni-oan fila ba RAEOA hodi hakore-an husi susar, Movimentu ne’e konsidera Autoriedade RAEOA hamosu Desizaun Diskriminativa.
‘’Iha loron 10 fulan ida ne’e, estudante no komunidade buka moris iha kapitál Dili, preparadu atu fila, maibé ró Sukses tula de’it pasajéiru hamutuk ema nain 40 bazeia ba desizaun Prezidente Autoriedade RAEOA/ZEEMS maske seidauk tuir teste SWAB ’’ hato’o porta-vóz Zeca Afulit Coa iha konferénsia Imprensa kuarta-feira ne’e, fatin portaun Gabinete RAEOA/ZEEMS Faról, Munisípiu Dili.
Hafoin desizaun ne’e realiza, estudante no komunidade pasénsia hodi hein semana ida tan atu hala’o viázem tuir oráriu normál.
‘’Bainhira desizaun ne’e realiza, ami kontinua hein tuir oráriu normál to’o loron 16, viázem Dili-Oekusse ho ró Sukses la halo tuir oráriu normál katak tuku 03:00 loraik, maibé hala’o fali iha sábadu madrugada hodi obriga passajéiru toba de’it iha portu Dili no la konsege tula passajéiru ba Oekusse’’ fontes ne’e klarifika.
Ho akontesimentu hirak ne’e, movimentu konsidera hanesan desizaun diskriminativu no la iha tratamentu profesionál husi Ró Sukses ne’ebé sempre sussesu lori pasajéiru viázem dili-Oekusse.
‘’Haree ba akontesimentu ne’e, konsidera Prezidente Auoriedade halo diskriminasaun ba nia Povu no la iha tratamentu professionál husi Ró Suksses’’. Porta Vóz afirma.
Ho nune’e, Movimentu husi Atoni-oan ezize ba prezidente Autoriedade labele foti desijaun diskriminativa.
‘’Ho afirmasaun sira ne’e, ami Movimentu estudante ezize ba Autoriedade labele foti desijaun diskriminativa hasoru estudante no komunidade atu labele assesu ba transporte marítima iha situasaun difísil ida ne’e no husu atu halo lalais disijaun ba situasaun ne’ebé estudante no komunidade hasoru hodi nune’e labele hanaruk tan susar ne’ebé ami hasoru’’. Ezizénsia husi Atoni-oan.
Durante ne’e Estudante no komunidade hala’o ona teste SWAB atu hala’o viázem tuir kritériu ne’ebé SIJK fo sai maibé seidauk iha desijaun ruma husi parte RAEOA atu transoporta ema hirak ne’e.
Razaun ne’ebé obriga populasaun RAEOA iha kapitál Dili hakarak fila tamba la iha ona osan atu selu uma-aluga no osan ba hahan atu nessesita sira nia moris.
Tuir dadus ne’ebé iha, ema nain 300 resin mak hakarak fila ba sira nia rai moris fatin tamba relasiona ho SS no inundasaun ne’ebé akontese iha semana balun liu bá no hirak ne’ebé hakarak fila, maioria hala’o ona teste SWAB tuir kritériu husi SIJK hodi hein intervensaun husi Autoriedade RAEOA atu transporta populasaun hirak ne’e fila ba RAEOA.
Jornalista : Julio Paixão/Dominggos Lero.
Editór: Arménio.
loading="lazy" />