G-RTV News: Prezidente Autoriedade Munisípiu (PAM) Dili hamutuk ho Xefe suku sira hala’o enkontru ho Primeiru Ministru Taur Matan Ruak, hodi koalia konabá programa vasinasaun ba Covid-19 nian.
‘’Ohin, ami mai hamutuk enkontru ho Primeiru Ministru(PM) ho objetivu atu koalia konabá programa vasinasaun iha munisípiu dili, tamba xefe Guvernu hakarak rona direita husi autoridade lokál ba preokupasaun sira ne’ebé durante ne’e mosu’’. Hateten PAM Gaspar Soares hafoin enkontru ho PM iha ministériu finansas, Aitarak Laran, Dili (08/06).
Nia hatutan tan katak, Xefe Suku sira iha munisípiu Dili husu atu hala’o vasinasaun obrigatóriu atu komunidade sira bele partisipa iha vasinasaun ba prevensaun Covid-19.
‘’Ohin, Xefe Suku sira aprezenta ba PM, husu atu bele karik vasinasaun ne’e obrigatóriu atu nune’e komunidade sira hotu bele partisipa, tambá to’o Dezembru ita bele atinji to’o 80%, atu minimiza moras hada’et Covid-19’’. Haktuir Gaspar.
Enkontru refere, Xefe suku sira fó hanoin moos ba guvernu sentrál atu hadia falhansu sira ne’ebé akontese relasiona ho programa vasinasaun ne’ebé agora dadaun ne’e la’o.
Oras ne’e dadaun, Munisípiu Dili kontinua hala’o serka sanitária no númeru kazu Covid-19 ne’ebé deteta iha tersa-feira ne’e, hamutuk 80, aumentu ho territóriu nasionál hamutuk ema na’in 98, mane iha na’in 47 no feto 51. Iha sala izolamentu vera Cruz, pasiente hamutuk na’in 27 ho nia estatut moras ne’ebé la hanesan.
Kazu rekoperadu kontinua ezisté ho totál 214 iha territóriu nasionál, nune’e kazu ativu hamutuk 2115 no óbitu ida ho idade 86 husi minisípiu Dili.
Jornalista : Arménio.
loading="lazy" />