G-RTV News (13/05/2021): Artista no Prizioneiru Juga Gama hakotu íis iha sala izolamentu Vera Kruz tamba sofre moras Lepra no deteta Covid-19 iha nia isin.
Hafoin simu informasaun konabá matebian refere, vokalista Banda Fitun Furak hato’o Katak sente laran taridu tamba lakon maun no artista senior ida iha Timor Leste.
‘’Ohin, mais ou menus liu tuku 4 loraik, ami rona notísia laran taridu ida katak, maun no kantór senior Juga Gama hakotuk íis iha Sala izolamentu vera Kruz, ba ami banda fitun Furak, sente triste tamba konsidera katak nia ne’e hanesan artista foinsa’e ida iha momentu ne’ebá, famozu ho nia múzika pop sira ne’ebé sempre anima komunidade Timor-oan’’. Haktuir Vokalista Banda Fitun Furak Adey Cruz iha Bekora, Munisípiu Dili (13/05).
Vokalista ne’e hatutan tan, maske hasoru kazu balun ne’ebé lori nia tenke ba prizaun maibé nia obra iha mundu múzika Timor nian sei la mate.
‘’Klaru, nia iha duni kazu balun ne’ebé lori nia to’o prizaun no hakotu íis, maibé hanesan foinsa’e no kantór, ami banda Fitun furak orgulhu ho nia tamba nia obra iha mundu múzika Timor nian sei la mate, sei bele relebra nafatin to’o agora’’. Espressa Adey.
Tuir esperénsia, Banda Fitun Furak, iha Tinan balun liu bá, hala’o animasaun hamutuk iha Prizaun Bekora.
‘’Banda Fitun Furak, tuir esperénsia, ami moos dala ida, anima hamutuk iha prizaun Bekora, ha’u la lembra ne’e loron saida, maibé iha tinan 2017, hamutuk ho artista senior balun, nune’e, hanesan kantór no banda foinsa’e ami aprende husi maun senior sira, inklui Matebian nia Apa ne’ebé moos husik ona mundu ne’e, Maun Abito Gama, no Matebian Juga Gama Rasik. Ho Orasaun Tomak, Nai-Maromak sei haraik Fatin di’ák Ba Nia’’. Vokalista ne’e haktuir.
Tuir Informasaun ne’ebé G-RTV.Com assesu katak matebian tama iha sala izolamentu Vera-Cruz iha loron 11 Fulan ne’e, no tuir lolos iha Tinan ne’e livre ona tamba hatudu komportamentu di’ak durante kumpri nia sentesa hanesan ema dadur ida.
Matebian Juga Gama, mate ho idade 41 no husik hela kaben no oan na’in 4.
Jornalista: Arménio.
loading="lazy" />