Berlin Ramelau Avaria, La Iha Serteja bá Viázem, APORTIL Prontu Devolve Osan Billete

G-RTV.com (Dili) : Rô Berlin Ramelau ne’ebé guvernu Timor Leste no Alemaña sosa no konstrui iha Xina, odamatan bo’ot avaria iha portu Dili.

Akontesimentu ne’e akontese iha loron 13 fulan Janeiru tinan 2022 iha óras tuku 9 dadér, molok atu hala’o viázem bá Oe-Cusse.

‘’ ohin ne’e, iha problema ho odamatan bo’ot tambá loke no taka maibé labele xave-an nune’e situasaun ne’e, parte rua entre APORTIL no crew rô nian deside labele hala’o operasaun’’. Haktuir diretór Cabotagem Nacional-APORTIL, Felisiano da Costa iha portu Dili.

Diretór ne’e informa liu tan, rô refere iha hela garánsia nia laran nune’e sei halo kontaktu ho konstrutór sira husi Alemaña no Xina atu rezolve problema refere  nune’e la iha serteja bá viázem nian.

Nia esklarese tan, hahu aban bá oin,  sei hadia no konabá osan billete ne’ebé passajeiru sira hakarak kansela viázem, ‘’bele devolve fali iha óras servisu nian’’ . esklarese Felisiano.

Tuir observasaun direta, parte tékniku rô nian la foo infomasaun klaru ba avariasaun refere, nune’e ‘’kastigu’’ passajeiru sira hodi hein iha portu Dili hahu iha tuku 9 dadér to’o tuku 10 kalan mak foin deside hodi fila bá idak-idak nia hela fatin no balun obrigatóriamente tenke toba iha area portu Dili no rô laran.

‘’Assidente hanesan ne’e normál maibé ami lamenta konabá atendimentu husi APORTIL nian tambá prolonga óras to’o passajeiru hamutuk 400 resin tenke hein to’o kalan bo’ot, hanesan ami ho oan nurak, transporte la iha atu hola hahan no fila bá uma, ami labele halo buat ida’’. Espressaun lamentasaun husi passajeiru Belarminu dos Santos.

Rô foun Berlin Ramelau konstrui iha Xina ne’ebé hetan finansia husi  Guvernu Timor Leste no Alemaña ho osan hamutuk €14.9  no to’o iha Timor Leste iha loron 10/12/2021, inagurasaun offisiál ba rô foun ne’e hala’o iha loron 20/12/2021 husi Primeiru Ministru Taur Matan Ruak.

Jornalista : Arménio.

Editór : Ekipa G-RTV.com.