Bobonaro ‘’Banjir’’ Ho Apoiante JRH, Xanana La Simu Lú-Olo

Jornalísta : Arménio //

G-RTV.Com (Bobonaro): Kandidatu prezidente repúblika (PR) períodu 2022-2027, José Ramos-Horta (JRH), kontinua  hala’o nia kampaña eleitorál ba dala-8 iha Munisípiu Bobonaro-Villa.

Kampaña ne’e hetan partisipasaun máxima husi komunidade, militante no simpatizante CNRT, partidu apoiante seluk, movimentu sira, kuaze ema rihun resin, hatudu apoiante JHR ‘’Banjir’’ (Lian-Indonézia) iha Bobonaro.

Iha komísiu kampaña, kandidatu prezidente ho númeru sorteiu 14 ne’e, afirma, Bobonaro tenke sai modelu dezenvolvimentu di’ák.

‘’Bobonaro tenke sai modelu dezenvolvimentu di’ák, ita iha fronteira ne’e importante tebes ho relasaun ho indonézia no rai hotu’’, afirma kandidatu ne’ebé hetan konfiansa husi partidu CNRT lideradu husi líder nasionál Kay Rala Xanana Gusmão, iha kampu futeból maliana-villa, 10/03/2022.

Konabá violasaun konstituisaun ne’ebé JRH konsidera komete husi atuál PR Lúo-Olo sai matéria kampaña eis-prezidente repúblika 2007-2012 nian, promete sei rezolve ho seriedade.

‘’Ho seriedade ha’u tenke hadia violasaun konstituisaun ne’ebé viola husi atuál prezidente repúblika (PR), hahu ho la fó toma posse ba membru guvernu husi CNRT no KHNUTO’’, hatutan Horta.

Atu rezolve konstituisaun, JRH bainhira eleitu sei hahu diálogu ho entidade sira hotu atu fó solusaun hodi hatur hikas fali konstituisaun iha nia fatin.

‘’Hahu ho diálogu ho partidu polítiku hotu, líder sira no konfisaun relijiaun sira atu rona opiniaun hodi forma guvernu konsensu ka guvernu foun ruma’’. Tenik Horta.

Iha fatin hanesan, prezidente partidu CNRT, Kay Rala Xanan Gusmão, ‘’apresia’’ Bobonaro-oan sira  tambá hatene deside buat di’ák ba nasaun.

‘’Imi hatene tuir saida mak akontese iha ita nia rai, imi hatene saida imi deside ba ita nia rai, atu hatur fali konstituisaun iha nia fatin nu’udár referendum daruak iha loron votasaun 19 Marsu 2022’’, dehan Xanana.

‘’Ita nia airin 4 ( Prezidente, Parlamentu, Tribunál, Guvernu), malahuk ona, Lú-Olo ne’ebé uluk sai prezidente assembelia konstituisaun prova konstituisaun Repúblika, nia assina, maibé sa’e tiha ba PR, sama fali konstituisaun, ida ne’e mak ita la simu’’,Deklara eis-prezidente 2002-2007 ne’e.

Nia mós apela ba Bobonaro-oan sira hotu atu labele monu ba provokasaun hodi fó sussesu ba eleisaun prezidensiál 2022 no atu fó vitória bá José Ramos-Horta. (REMATA).