Brigada Lere Anan Timur Hamri’ik Atu Lori LAT Ba Ukun, Juventude Tibar Mos Apoiu

Jornalísta : Arménio //

G-RTV.com (Dili) : Lori vitória ba kandidatu Prezidente Repúblika 2022-2027, Lere Anan Timur (LAT), Brigada Lere Anan Timur (BLAT) hamri’ik hodi lori Tenente Jenerál Rerormadu ne’e bá Palásiu Ai-Tarak Laran.

‘’ Iha loron 12 fulan ida ne’e, juventude iha territóriu nasionál enkontru iha largu lecidere hodi forma BLAT no deside fó votus konfiánsa bá LAT atu hetan vitória hodi ukun povu Timor Leste’’, Deklara Porta-Voz, Rigo Gautula iha area Largo Lecidere, 26/02/2022.

BLAT konsidera, LAT nu’udár komadante revolusionáriu ne’ebé mai ho nia filozofia mak marka diferensa.

‘’ LAT hanesan komadante revolusionáriu husi gruerra, ho nia folozofia mak marka diferensa, no la iha osan atu fahe bá povu, maibé iha domin bá povu, unidade, páz, solidariedade no justisa, tambá hirak ne’e mak sai mata dalan bá dezenvolvimentu’’, dehan porta-voz.

Brigada ne’e mós fiar katak bainhira eleitu, kandidatu ho númeru sorteiu 8, sei halo servisu tuir konstituisaun RDTL, promove diálogu, tetu orsamentu jerál estadu molok aprova, konsidera direitu liberdade espressaun sidadania hodi kombate injustisa no diskriminasaun sosiál.

Iha loron ne’ebé hanesan, grupu juventude husi suku Tibar (Likisa)mos, deklara sira nia apoiu kandidatu ho naran kompletu Tito da Costa.

‘’ Ami ne’ebé halibur iha ne’e, mai husi juventude Tibar, fó ami nia apoiu inkondisionál ba ita nia aman jenerál LAT. Ami fiar iha nia lideransa no esforsu atu harii fali unidade entre lideransa, hametin estabilidade, hodi fasilita prossesu tranzisaun ida sustentável bá futuru Timor Leste’’,Afirma Sónia Fátima iha suku Tibar, munisípiu Likisa, Sábadu ne’e.

Razaun hirak ne’ebé lori sira atu apoiu LAT nia kandidatura, tambá períodu tinan lima bá oin, sai hanesan períodu krítiku tebes atu foti hikas konstituisaun tuir nia dalan, hametin funsionamentu estadu no Timor Leste presija la’ós de’it maun bo’ot maibé hanesan aman ida atu hametin liu tan unidade.

Nune’e, juventude Tibar, liu husi leitura polítika, komprometidu no deklara sei fó apoiu tomak ba kandidatu LAT ne’ebé mai husi munisípiu Lautém, Iliomar, nu’udár mós funu na’in iha ailaran durante tinan 24.

Entretantu, kandidatu Prezidente Repúblika 2022-2027, LAT mai ho nia antesetende ne’ebé forte iha lideransa nasaun Timor Leste iha kedas luta ba ukun rasik-án tinan 1975-1999 no kontinua iha vida militar to’o reforma iha fulan fevereiru tinan ne’e.(REMATA).