G-RTV.Com : Komisaun Anti Korrupsaun (CAC-sigla portugês), ezekuta mandadu buska iha domisíliu no prende sasan husi Tribunál Distritál Dili (TDD) ho númeru NUC 0007/21.CAC TL ba Autoriedade Portuariu Timor Leste (APORTIL).
Iha ezekusaun buska refere, CAC hala’o bá iha diresaun nasionál Cabotage-APORTIL ne’ebé iha ligasaun ho prossesu inísiu bá aluga Rô Tranship II hodi prende dokumentu sira ne’ebé liga ho aluga Rô Tranship II inklui ekipamentu hanesan komputadór no karreta ne’ebé uja husi diretór diresaun Cabotagem iha segunda feira ne’e, 16/08.
Prossesu buska ne’e hala’o kuaze óras rua resin ne’ebé hahu iha tuku 9 dadér, iha edifísiu Cabotagem-APORTIL no iha óras tuku 11 resin, hala’o fali iha edifísiu sentrál APORTIL, portu Dili ne’ebé investigadór husi CAC hasoru direta ho Prezidente APORTIL, Flavio Neves hodi husu atu bele kopera ho CAC ba prossesu buska hotu ne’ebé hala’o iha nia fatin.
Bainhira hasoru malu ho Prezidente APORTIL, ho kalma, nia konfesa ba investigadór CAC katak konabá kontratu no pagamentu ba Rô Tranship II, nia ‘’du’un’’ ba Ministru Transporte no Komunikasaun.
‘’Kontratu Ministru mak aprova direitamente inklui prossesu pagamentu, maske pagamentu refere seidauk la’o, ami hala’o de’it servisu tuir irarkia’’, Flavio espressa ho kalma.
Kooperasaun di’ák husi parte APORTIL ho CAC durante prossesu mandadu buska, ho de’it oras ida resin iha sede sentrál APORTIL, CAC kontinua hala’o mandadu buska bá diretór nasionál Cabotagem ho inisiál ‘’FdCC’’ nia rezidénsia iha aldeia moris foun, suku Komoro, munisípiu Dili hodi prende moos dokumentu balun.
Hafoin ida ne’e, CAC kontinua lori diretór nasionál Cabotagem bá iha edifísiu CAC hodi haklean investigasaun no possibilidade sei detein karik hatudu evidénsia forte tuir rezultadu investigasaun ba rô tranship II ne’ebé aluga husi MTK lidera husi José Agustinho da Silva ho objetivu atu substitui provizoriamente hodi hein manutensaun husi Rô Berlin Nakroma no rô Sucsses ne’ebé nia dokumentus mate hodi hala’o operasaun DILI-RAEOA no ATAURO.
Iha prossesu investigasaun, pessoál investigadór husi CAC hamutuk 12 ne’ebé akompanha moos husi Servisu Investigasaun Kriminál-PNTL.
Antes ne’e, iha loron 10 fulan juñu tinan ne’e, CAC liu husi adjuntu komissáriu bá assuntu prevensaun no sensibilijasaun, DR. Luis de Oliveira Sampaio, orienta ekipa CAC atu halo investigasaun iha Rô refere, husi rezultadu investigasaun ne’e, CAC rekomenda ba iha MTK ne’ebé lidera husi atuál Sekretáriu Jerál Partidu KHUNTO atu suspende temporariamente konabá operasaun bá Rô Tranship II ho razaun tambá dúvida no fatal tebes iha prossesu aprovizionamentu aluga rô Tranship II Gresik husi Indonézia nian.
Rô tranship II, fabrikadu iha tinan 2008, tula passajeiru máximu 325 no estadu timor leste aluga, kada fulan tenke entrega osan ho montante osan $250.000 USD, ba Rô Tranship II, maibé la inklui mina ba motór Rô nian hodi hala’o kada operasaun.
To’o oras ne’e, Rô ne’ebé konsidera hanesan anju ba laran metan sira tambá CAC idenfitifika iha indísius forte bá KKN (Korrupsaun, Kolusaun no Nepotíssmu) , oras ne’e dadaun la iha ona iha Timor Leste iha fulan balun liu bá hafoin hala’o operasaun hahu iha fulan Maiu tinan 2021, tambá guvernnu ne’ebé lidera husi PM Taur Matan Ruak, deside hapara operasaun.
Jornalista : Arménio.
Editór : Ekipa G-RTV.com
loading="lazy" />