G-NEWS (DILI) – Sekretariadu Tékniku Partidu CNRT Joãozito Viana ba G-News, Sábadu (01042023) informa, Partidu CNRT prepara ona atu kompete iha Eleisaun Parlamentar iha loro 21 fulan Maiu tinan 2022, desde Prezidente Repúblika Francisco Guterres Lú Olo rejeita fó posse ba membru Governu hosi Partidu CNRT.
“Tuir loloos Partido CNRT preparadu ba Eleisaun hahú kedas bainhira Prezidente Lu Olo iha tinan 2018 rejeita atu fó posse ba Membru Governu indijitadu husi Partido CNRT no membru koligasaun AMP – Aliansa Mudansa ba Progresu sira seluk” Joãozito esplika.
Joãozito Viana klarífika tá, situasaun ne’e halo Governu frájil tanba la kompletu, dezenvolvimentu labele lao diak no mosu problema sosial barak. Situasaun ne’e obriga Partido CNRT iha tinan 2020 ses husi AMP hodi nune’e loke dalan ba Eleisaun.
“Momentu oportunu ba Prezidente Repúblika Francisco Guterres Lú Olo hodi husik nia Partidu Fretilin korta dalan foti AMP no hadau poder, mesmuké ho konsiénsia viola prinsipius no valores demokrásia, no estadu de Direitu Demokrátiku”, Nia aumenta tán.
Sekretariadu Tékniku Partidu ne’e konfirma tán, situasaun hirak ne’e hotu, no aumenta ho problema lubuk ida ne’ebé povu hasoru kontribui ba Partidu CNRT atu konvoka eleisaun.
Relasiona ho partidu istóriku FRETILIN ne’ebé lídera hosi Marí Alkatiri no Francisco Guterres Lú Olo, hamutuk ho Partidu Libertasaun Popular (PLP) líderadu hosi Taur Matan Ruak, no Partidu KHUNTO ne’ebé lídera hosi Naimori ho influensia polítika, maibé sempre derota kuandu hasoru Partidu CNRT ne’ebé lídera hosi Kay Rala Xanana Gusmão.
“Esperiénsia esplika plataforma Fretilin, PLP no KHUNTO iha tinan 2022 hamutuk hodi apoiu kandidatu Lú Olo hasoru kandidatu CNRT, maibé rezultadu hatudu povu maioria rejeita kandidatu husi Plataforma nian. Kandidatu CNRT mánan iha Eleisaun, no lori Ramos-Horta nu’udar Prezidente Repúblika”, Joãozito esplika tán.
Tuir Sekretariadu Tékniku CNRT nian katak, nu’udar Partidu Polítiku ne’ebé hatene didiak situasaun Estadu nian no iha vizaun estadu, CNRT fiar án no pronto atu hasoru partidu hotu-hotu, inklui Plataforma ne’ebé ho orientasaun deit mak poder maibé la hatene jere Estadu nune’e povu hetok moris susar nia laran. Teste hatudu iha Eleisaun Prezidensial foin dadaun liubá, kandidatu husi Partido CNRT mánan hasoru partidu sira ne’ebé halai hamutuk; Fretilin, PLP, KHUNTO, no seluk tán.
“Partidu ne’ebé kaer ukun, grupu maiória iha Parlamentu tenke sofre lakon hasoru CNRT. Ne’e hatudu saída, Povu maiória la fiar ona partidu sira ne’ebé kaer ukun, no tau esperánsa bo’ot ba partidu CNRT. CNRT fiar katak, povu verdadeiramente sente ukun-nain sira agora sai fukun hosi problema sosiál no ekonómia ne’ebé monu, laiha kampu servisu, folin sasan sae maka’as, mal-nutrisaun sae, no kiak aumenta, no problema barak tán”, Nia esplika.
“Konsiénsia públiku no povu hakarak mudansa, hakarak dezenvolvimentu, dalan maka CNRT ukun atu hadia Estadu ida ne’e, hari’i oportunidade ba ema hotu no lori povu hateke ba Timor-Leste ida prósperu. Hatudu hosi animo, no ejizensia hosi povu loron-ba-loron iha konsolidasaun no komprimisu sira, fó duni dalan iha Eleisaun Parlamentar iha loron 21 Maiu 2023 núdar Loron Vitória ba Povu no CNRT”, Joãozito aumenta tán.
Maske sidadaun balun preokupa kona-ba seguransa rai laran, Joãozito esplika liután katak, kuadrus, militantes no simpatizantes Partidu CNRT sólidu no leal ba orientasaun Prezidente CNRT Kay Rala Xanana Gusmão, tanba hatudu ezemplu domin, no nu’udar promotor ba paz; iha fatin hotu-hotu sempre promove fraternidade no iha biban hotu-hotu banhira koalia ho kuadrus no militantes CNRT atu káre domin ba malu, no hakribi violénsia. Akela situasaun hotu-hotu, CNRT kontra violénsia.
“CNRT maduro iha politiku, organizadu hatudu iha tinan 7 ikus ne’e, apenas hadau poder husi CNRT, rejeita kuadrus CNRT sai membru Governu, humiliasaun maibé lao tuir deit regras demokrátiku, no Leis. Hau fiar, militantes no simpatizantes CNRT maduro liu no hadomi paz kompara ho partidu seluk”, Sekretariadu Tékniku CNRT Joãozito Viana termina nia esplikasaun.
Jornalista : Ekipa G-News
Editór Testu : Amito Qonusere Araújo
loading="lazy" />