Jornalísta : Arménio //
G-RTV.Com (Dili) : Hanesan ho Líder nasionál seluk iha Timor Leste, Prezidente Repúblika Portugál, Marcelo Rebêlo de Sousa nia primeira vizita hatudu nia jestu amizade ho povu Timor hodi sente mós katak rai-timor ne’e hanesan nia rai-rasik.
Jestu amizade ne’e hatudu iha nia primeira vizita mai Timor Leste, liu husi la’o ain hahu iha ótel Timor (Kolmera) to’o Sentru Konvensaun Dili (CCD-Sigla Português) hamutuk ho delegasaun tomak ne’ebé nia distánsia la’o-ain kuaze Kílómetru (KM) 2.
Tuir Dalan, Prezidente ne’ebé hatudu nia simplisidade sempre hase kualkér sidadaun ne’ebé hasoru nia no hasai foto hamutuk maske óras hakat ba loron manas iha tuku 11:00 resin.
To’o iha CCD, Rebêlo kontinua vizita feira ne’ebé realiza husi guvernu liu husi MTCI iha âmbitu komemorasaun tinan 20 restaurasaun independênsia no toma posse bá Prezidente eleitu, José Ramos-Horta.
Iha Feira, Xefe estadu Portugál bá dala-20 ne’e, hatudu nia jestu líder ne’ebé hakbesik-án bá povu, liu husi hasai foto, konversa ho sidadaun, entre tenda feira ida bá feira seluk, nune’e komunidade sira hatudu mós nia simpatia bá prezidente ne’e.
Hafoin vizita iha CCD, bá jornalísta sira, Robêlo ne’ebé lidera Portugál ho idade 74 ne’e kontinua mós hatudu nia preokupasaun konabá sidadaun Timor-oan ne’ebé kontinua hetan fallansu hodi tama iha rai Inglaterra no Irlanda.
‘’Tambá Pandemia Covid-19, nune’e difikulta birokrasia servisu iha administrasaun, konsuladu, no fronteira, nune’e habo’ot liu tan atendimentu servisu sira, maibé ho razaun katak mesak juventude de’it mak kontinua aumenta bá Portugál tuir akordu mobiliariu CPLP nune’e ami sei halais liu tan prossesu ne’e,’’ dehan prezidente ne’e.
Nia mós hato’o mensájem katak ‘’Agradese bá Timor ida ne’ebé sai ezemplu bá páz, demokrasia, liberdade no iha eleisaun ne’ebé livre iha mundu, ho esperánsa ida katak sei iha dezenvolvimentu ekonomia, sosiál tambá Timor Leste maioria iha povu ne’ebé juventude domina, nune’e bele sai jóvem ida ne’ebé bele responde bá mehi sira, no lori Timor Leste bá oin, ho nia fundamental mak edukasaun, ekonomia sosiál, ida ne’e ha’u iha esperansa bo’ot durante mandatu preziente eleitu nian,’’ Espressa Prezidente Portugál ne’e.
Iha nia vizita mai Timor Leste, nu’udár konvidadu ónra ida husi estadu Timor atu partisipa eventu rua mak toma posse bá prezidente eleitu període 2022-2027, José Ramos-Horta no komemorasaun tinan 20 restaurasaun independênsia nian.
To’o iha Aeroportu, tuku 7:00 resin iha tempu dadér ho aviaun Euroatlantic no tuir planu sei fila fali hamutuk ho delegasaun tomak iha loron 22/05/2022.
(REMATA)
loading="lazy" />