COVID-19 iha Brazíl : Semana Ida Halakon Ema Nia Vida Hamutuk 3.650.

G-RTV NEWS ( 27/03/2021) : Ezisténsia Covid-19 iha mundu hamate ona ema tokon no tuir informasaun ne’ebé publika iha TEMPO.CO, Jakarta ( Indonézia ) iha loron 27/03/2021, 11:30 Óras Indonézia ( WIB), ne’ebe G-RTV.COM Assesu katak,  dadus diária ne’ebé publika husi Ministériu Saúde Brazil, to’o iha loron 26/03/2021, informa katak  iha ona kazu Covid-19 pozetivu hamutuk 84.245 no halakon ema nia vida hamutuk 3.650.

Totál ema lakon vida ho númeru 3.650 ba semana ida nian, sai trajédia bo’ot iha semana ida ikus ne’e, no konsidera hanesan númeru ema lakon vida barak liu iha relatóriu semanál durante pandemia Covid-19 invade nasaun Samba refere.

Iha publikasaun TEMPO.CO sita moos katak durante ezisténsia Covid-19 iha nasaun Brazíl husi inísiu 2020 nian to’o ohin loron halakon ona ema nia vida hamutuk 300 Mil. Total ida ne’e sai hanesan númeru ema lakon vida bo’ot liu iha kontinente Amérika Latina.

Eis-Prezidente Brazíl, Luiz Inacio Lula da Silva iha loron Sexta-Feira, 26 Marsu 2021, iha nia intervensaun ba situasaun refere katak, ho númeru kazu ne’ebé ás konsidera hanesan Genócio bo’ot liu iha nasaun Brazil. Liafuan refere sai hanesan liafuan sadik ida ba prezidente atuál Brazíl Jair Bolsonaro.

‘’ Iha Loron Tersa-Feira, 23/03/2021, iha ema na’in 3.158 lakon vida (Mate) tamba Covid-19 iha Brazíl. Ne’e hanesan Genócio Bo’ot liu iha Istória Brazíl’’. Haktuir Lula da Silva no Lula haforsa tan katak Prezidente Bolsonaro la honestu ona ba sidadaun sira konabá pandemia Covid-19.

Lula da Silva husu atu sidadaun hotu no ekipa ne’ebé servisu ba Covid-19 hamutuk salva nasaun Brazíl husi Covid-19. Nia moos krítika atuál Prezidente Brazíl nia polítika tamba sei la hasai Brazíl husi Covid-19, nune’e Eis-Prezidente ne’e husu ba Bolsonaro atu husu deskulpa ba família afetadu sira ne’ebé lakon nia membru família.

Media Online TEMPO.CO, Jakarta informa liu tan katak,  ema liu milliaun 12 hetan ona infeksaun ba Covid-19 inklui Prezidente Brazíl Bolsonaro rasik. Inísiu, Bolsonaro hateten katak Covid-19 ne’e hanesan moras gripe ( Flu) babain.

Fontes : TEMPO.CO ( Jakarta).

Editór : Arménio.