G-NEWS (DILI) – Eis Deputadu Parlamentu Nasionál hosi bankada Fretilin Manuel de Castro Pereira, hakotu ona is, iha Hospitál Nasionál Guido Valadares (HNGV) Dili, iha tuku 11.30 kalan óras Timor Leste.
Alin hosi matebian, José Castro, informa ba G-News Sexta-Feira (07042023) kalan hateten, Eis Deputadu hosi Bankada Fretilin Manuel de Castro Pereira tama iha Óspital Nasionál, iha Kinta-Feira (06042023), tuku 12 kalan.
“Ha’u nia maun Manuel Castro, eis Deputadu. Ami agora iha mortuariu Óspital Nasionál. Tama ospital hodi kalan. Ami mai jam-12 kalan”, Nia informa.
Kona-ba kondisaun moras eis deputadu ne’e, José Castro esplika, tinan rua antes, eis deputadu ne’e sofre moras, no hala’o tratamentu saúde iha Ospitál Jakarta, Indonézia.
“Nia moras uluk ne’e tinan rua resin ona estomak, depois tinan kotuk ba ba halo operasaun iha Jakarta, operasaun tiha, depois fila fali mai, fulan neen ba check fila fali, moras ne’e daet tutan fila fali to’o nia aten sira ne’e kanek hotu, ne’e mak foin dadauk fulan rua liu ba, sira ba check-up fila fali, depois iha ne’ebá Doutór foti liman ne’e mak haruka fila fali mai”, nia haktuir tán.
“Primeiru operasaun estomuk, depois kanek sira ne’e daet tutan to’o fali nia aten no fuan bubu”, nia re-afirma tán.
Tuir planu, família matebian sei koordena ho autoridade Estadu kona-ba prosesu funerál.
“Agora sementara, ami sei hatais ba ninia uma iha kampung baru, depois aban ami sei konsultasi ho veteranus sira oinsa, fatin atu haloot, ne’e maibé ami sei lori ba Venilale, mak foin atu haloot ne’e desizaun Estadu nian”, nia hakotu.
Eis Deputadu Manuel de Castro Pereira, moris iha Bahadato/Fatulia Munisípiu Baucau, iha loron 09 fulan Agusto tinan 1961.
Eis deputadu Manuel de Castro Pereira, hahú hala’o funsaun nu’udar Deputadu iha loron 30 fulan Jullu tinan 2012 iha terseira lejislatura, iha komisaun E.
Matebian nia funsaun polítika no sosiais hanesan Koordenador Partidu Fretilin Postu Venilale, Munisípiu Baucau, no eleitu sai membru CCF suplentu hosi tinan 2011 to’o 2017.
Eis deputadu ne’e, hetan kondekorasaun hosi Estadu ho Oreldem de Nicolau Lobato grau-2.
Jornalista : Ekipa G-News
Editór Testu : Amito Qonusere Araújo
loading="lazy" />