G-RTV News (09/04/2021) : Akontesimentu inundasaun loron 04 fulan ida ne’e, iha kapitál Dili, afeta mós ba família ema ho difisiénsia fíziku sai vítima iha Bairro Foun, Suku Komoro, Postu Administrativu D. Alexo, Munisípiu Dili.
Tuir vítima ho kondisaun difisiénsia, Agustinho Soares, haktuir katak bainhira hader mai, bé tama ona uma-laran :
‘’Ha’u hanoin udan ne’e normál, nune’e ami deskansa hanesan babain, bé hahu tama iha óras 00:00 kalan, maibé seidauk to’o 50 Cm, iha óras dadér mak vizinhu sira mai bolu,hakfodak be sa’e maka’as iha uma-laran’’, Vítima haktuir ba G-RTV.com iha kampu refuziadu FMA, Komoro, Dili.
Vítima hatutan tan katak lakohi atu evakua husi nia uma, husik fen no oan de’it mak evakua :
‘’Di’ák liu ha’u iha uma, husik ha’u nia fen no oan mak ba, maibé vizinhu sira obriga no hulan ha’u ho ha’u nia kadeira roda, ami mai fatin seguru, la to’o óras, husi Dom Bosco Evakua kedas ami mai.’’
Konabá sasan-uma laran, Agustinho informa katak, la iha ida mak salva, ‘’Fós, Mina, bikan, kanuru, sasan ba te’in nian no ropa sira inklui osan laran metin nian mós bé lori hotu’’. Informa husi vítima.
To’o oras ne’e vítima sira sei iha kampu refuziadu iha FMA Comoro hamutuk ho nia oan ne’ebé foin fulan 8.
Ema ho difisiénsia ne’e moris hamutuk ho nia kaben ne’ebé ho kondisaun difisiénsia fíziku hanesan, no iha ona oan na’in tolu, ida iha Konventu Laga no ida seluk hamutuk ho nia família iha knu’a, ikun ho idade fulan 8 ne’ebé hamutuk ho nia Inan-Aman hodi hasoru inundasaun.
Jornalista : Julio Paixão.
Editór : Arménio
‘’Família Bo’ot Kompanhia GARDAMOR hato’o solidariedade ba Família afetadu Inundasaun iha Territóriu Nasionál , liu-liu iha kapitál Dili, ne’ebé akontese iha loron 04/04/2021, Forsa nafatin ho korázem tomak, atu ita hotu bele ultrapassa situasaun difísil ida ne’e’’.
loading="lazy" />