G-NEWS (DILI) – Casa Militár Prezidente Repúblika, Autoridade seguransa no Komisaun Autoridade Tráfiku Úmanu hala’o enkontru urjénsia ho sidadaun Timor-oan naín 200 resin, ne’ebé sei aranka ba rai liur semana oin, Kuarta-Feira (19102022), iha Palásiu Prezidénsia Aitarak-Laran Dili.
Xefe Casa Militár Interino Maijór Francisco da Silva hateten, ekipa hirak ne’e hala’o enkonru ho Timor –oan naín 200 resin kona-ba situasaun ne’ebé Timor-oan sira enfrenta, hodi buka solusaun.
Lei Servisu Nasionál seguransa nian iha Artigu 21 hateten, Prezidente Repúblika iha dever atu kontrola entidades seguransa nian.
“Tuir Lei servisu Nasionál seguransa nian, ita nia Prezidente hanesan aman ba nasaun ne’ebé, iha dever atu kontrola entidades seguransa nian”, Maijór Francisco haktuir.
Entertanto iha Loron 7 fulan Outubru 2022, Prezidente Repúblika konvida membros reuniaun Konsellu Defeza seguransa hodi konvoka ona enkontru no parte Governu, atu lori fila ona sidadaun timor oan nain 20 ne’ebé ajensia privadu abandona iha rai liur hanesan Abudabi, Malázia, Portugal no Alemaña.
Entertantu, durante ne’e, Timor-oan barak, liu-liu joven sira kontinua trata dokumentu sidadaun Portugeza nian, nune’e bele ba iha Nasaun sira iha kontinente Europeia, nune’e bele servisu hodi sustenta ba nesesidade família.
Maske nune’e, ikus-ikus ne’e Timor-oan barak foti risku hodi ba Portugal, ne’ebé fasilita hosi ajensia ka grupu balun, ikus mai timor-oan balun sai ona vítima, balun toba iha Jardim sidade Portugal, maibé sei kontinua ba nafatin.
Tuir informasaun ne’ebé G-NEWS rekolla katak, sidadaun Timor ne’ebé hili dalan sai traballador iha rai liur, tamba iha Timor, maiória la asesu ba iha kampu traballu.
Jornalista : Amar Belo
Editór : Amito Qonusere Araújo
loading="lazy" />