G-NEWS (DILI) – Sosiedade tomak preokupa ho modelu atributu Partidu nian, ne’ebé hanesan ho atributu organizasaun Arte Marsiais hanesan Organizasaun IKS PTL Kera Sakti.
Ikus-ikus ne’e, membru Organizasaun Arte Marsiais IKS PTL Kera Sakti Timor Leste, produs kamizola partidu balun, ne’ebé ho modelu hanesan ho atributu Organizasaun Kera Sakti nian.
Diretór Ezekutivu IKS PTL Kera Sakti Timor Leste Samuel Guterres, ba G-News Kuarta-Feira (05042023) informa, Organizasaun Kera Sakti la konsidera atributu modelu organizasaun nian.
“Kamiza ne’e IKS la konsidera hanesan atributu organizasaun IKS , tamba IKS nia atributu lolos ho modelu hanesan ne’e la iha, maibé tanba ema sira ne’ebé produz kamiza ne’e maiória ema IKS, entaun ami hanoin sira iha objetivu polítika karik sira mak bele esplika ho klaru, maibé estrutura nafatin husu ba sira atu konsidera mós ideia husi estrutura no membru IKS nia hanoin kona-ba oinsa utiliza kamiza ne’e”, Nia esplika.
Tuir Samuel katak, produsaun kamiza ho modelu IKS sei la estraga imajen Organizasaun nian.
“Ha’u hare la estraga direta imajen IKS tanba hanesan Ha’u dehan ona katak, kamiza ne’e laos atributu IKS, maibé públiku mak dalaruma sei konfuzaun ho kamiza ne’e dalaruma públiku hanoin IKS apoiu partidu Fretilin, maibé lae. Organizasaun IKS lá envolve iha partido polítiku ruma. Maibé membru IKS kuaze maiória envolve iha partido polítiku até Prezidente IKS rasik mós hanesan Prezidente Partido PUDD maibé membru IKS laos ba hotu PUDD. Prezidente IKS rasik mós husu atu labele asosia polítiku ho organizasaun IKS, no Ha’u apresia tebes ida ne’e, hatudu katak membru IKS livre atu eskolla Partidu saída deit mak sira hakarak”, Nia esplika tán.
Tanba membru Organizasaun Kera Sakti balun preokupa kona-ba produsaun kamiza ho modelu Organizasaun nian, Estrutura Nasionál husu ba membru tomak atu hapara ona produsaun kamiza, ho konsiensia nu’udar membru ba Organizasaun Arte Marsiais, hanesan Kera Sakti.
“Ami só fo deit sujestaun ba sira atu hapara produz kamiza ne’e maibé tanba baze fundamental ne’ebé haforsa ami atu obriga sira hapara la iha entaun ami só husu deit ho konsiensia ba sira nu’udar membru IKS atu kompriende, ho husi fuan ba fuan. Tamlnba ida mós hanesan ha’u dehan ona, ami la rekonhese kamiza ne’e hanesan atributu IKS, oinsa mak itá bele bandu kamiza ne’ebé laos IKS nian”, Samue haklean liu tán.
Foin lalais ne’e, Organizasaun IKS PTL Kera Sakti Timor Leste hasai ona sirkular atu bandu membru tomak atu labele envolve iha atividade partidu nian.
“Iha dia 9 de Marsu 2023, ami hasai ona sirkular ida ho númeru ref : 03/DN-IKSPTL/III/2023. Iha sirkular ne’e ami bandu atu membru IKS ne’ebé iha Timor Leste no iha diaspora, ami la autoriza atu uja atributu organizasaun ho modelu saída deit iha atividade konsolidasaun partidu no tempu kampanha”, Diretór Ezekutivu ne’e esplika liu tán
Tanba ne’e, Diretór Ezekutivu Kera Sakti Samuel Guterres husu ba membru IKS hotu atu hatudu matenek, hodi kria paz no garante estabilidade bainhira tempu konsolidasaun no kampanha.
Jornalista : Ekipa G-News
Editór Testu : Amito Qonusere Araújo
loading="lazy" />