Extende Projetu Revista Lafaek, Horta : Husik Labarik Sira Lori Ba Uma

Jornalísta : Arménio //

G-RTV.com (Ermera) : Prezidente Repúblika (PR) José Ramos-Horta, partisipa serimónia assinatura entre CARE Internasional no embaixada Nova-Zelandia hodi extende tan apoiu bá projetu revista Lafaek iha tinan 5 tan.

Iha entrevista, PR konsidera, revista ne’e hanesan ajuda adukasaun extra bá labarik sira hodi kria ámbitu ba leitura tambá populasaun la assesu ba literatura.

‘’ Revista Lafaek tinan 20 ona ho nia edisaun bá labarik, adultu no manorin sira, atu halo edukasaun extra hodi kria ábitu bá leitura tambá populasaun la iha assesu bá literatura, ne’e importante tebes,’’ Dehan PR, Horta hafoin assiste serimónia refere iha Eskola filial, suku Taraço, Postu-Administrativu Rai-Laku, Munisípiu Ermera, Kuarta ohin, 29/06/2022.

Premiadu Nóbel bá Paz ne’e, afirma liu tan, revista Lafaek presija to’o iha nível aldeia no husik estudante sira lori bá uma hodi lê.

‘’Importante mak ne’e, revista tenke to’o iha nível aldeia, ho professór sira nia matenek, kbi’it no domin hodi sai matan dalan bá labarik sira atu aproveita revista ne’e. Problema mak iha sistema edukasaun, manorin sira la husik labarik sira lori ba uma, tambá dehan sei estraga, ne’e la iha oportunidade atu lê, ne’e duni ha’u apelu bá Ministru (MEJD) iha ne’e no eskola sira hotu atu fó ba labarik (estudante) sira,’’ Afirma Horta.

Xefe estadu ne’e, halo mós komparasaun katak la iha problema ho labarik sira estraga livru-oan ida ne’ebé ho kustu ki’ik duké funsionáriu estadu, militár no seguransa sira estraga kareta estadu.

Iha fatin hanesan, Ministru Edukasaun, Juventude no Desportu (MEJD) Armindo Maia hateten, ‘’Hanesan uma na’in, revista Lafaek ne’e mosu iha kedas tempu primeiru guvernu konstitusionál, ha’u nu’udár ministru MEJD, ohin fila-fali mai iha ne’e atu sai testemuña assina kontratu bá revista Lafaek hodi extende tan. Revista ne’e nia utilidade bá labarik, mestre no komunidade sira, ho nia konteudu serve duni bá labarik no mestre sira,’’ Hateten Maia.

‘‘Ne’e materiál extra, maibé tuir peskiza husi CARE hatudu katak hasa’e labarik sira nia kapasidade atu lê, husi %5 to’o %10, tuir peskiza seluk kapasidade labarik sira atu lê ne’e ki’ik tebes,’’ Reforsa Membru Guvernu ne’e.

Nune’e mós parte CARE Internasionál konfirma, ‘’Projetu Revista Lafaek ne’e hanesan projetu ida-ne’ebé lansa husi Care Internasional iha Timor-Leste iha setór Edukasaun ne’ebé servisu hamutuk ho Guvernu Timor-Leste liu husi MEJD ho objetivu atu hadi’ak kualidade aprendizajen, hasa’e kapasidade lideransa, hadi’ak moris-di’ák família sira-nian iha aspetu sosiál no ekonomiku, inklui promove guvernasaun inkluzivu, no partisipasaun Juventude,’’ Konfima Diretór CARE Internasionál, Peter Goodffelow.

Apoiu Nova-Zelandia ba projetu revista Lafaek ne’e hahu husi 2006 to’o 2022 ho montante totál US $9 mill. Iha tinan 16 nia laran, no atu kontinua projetu ne’e nia servisu importante, Governu Nova Zelandia fo ona osan dollar amerikanu millaun 7.4 ba estensaun tinan lima (5) hodi apoiu liutan projetu revista Lafaek atu kontinua ninia servisu iha Timor-Leste husi tinan 2022 to’o tinan 2027.

(Remata).