Jornalísta : Arménio //
G-RTV.com (Bobonaro) : Timor Leste ohin, ba dala 5 iha era independénsia totál hala’o votasaun hodi hili nia prezidente repúblika foun bá períodu 2022-2027.
Iha loron votasaun ne’e, reprezentante Feto Leo-Hitu, hateten, kontente ho loron votasaun ohin tambá atu hili prezidente foun.
‘’Ha’u kontente ohin bele vota tambá hakarak hili prezidente foun atu bele hadia ita nia guvernu ne’e sai di’ák liu tan’’, Dehan Rofinha Dos Santos (22), nu’udár estudante no juventude Suku Leo-Hitu iha sentru votasaun EBC Leo-Hitu, 19/03/2022.
Nia afirma liu tan, iha suku refere partisipasaun máxima husi feto maibé sira iha difukuldade ne’ebé durante ne’e hasoru.
‘’Ami garante partisipasaun feto máxima maibé iha ne’e difikuldade mak rede internet inklui estrada, nu’udár juventude no estudante ami halerik bá ida ne’e’’, afirma Rofinha.
Nune’e mós, inan-feton iha sentru votasaun EBC Leo-Hitu, Ana Purificação Cardoso, idade 60 resin hatutan, sira hakarak hili prezidente ida ne’ebé taka dalan bá sira.
‘’Ami vota ne’e, atu nune’e labele iha tan COVID-19 hodi taka dalan bá ami hala’o atividade negósiu tambá ami nia oan sira eskola’’, espressa Ana.
Tuir observasaun iha terrenu, iha sentru votasaun ne’e, hetan partisipasaun husi komunidade votante sira inklui feto iha suku refere.
Iha suku Leo-Hitu, kompostu husi aldeia Aisa, Faloai, Ferik-Katuas, Mohak, Rai-Ulun ho nia totál populasaun 3000 resin. (REMATA).
loading="lazy" />