Jornalísta : Arménio //
G-RTV.com (Dili) : Komité Sentrál FRETILIN (CCF-Sigra português),marka istória foun iha âmbitu komemorasaun tinan 48 transformasaun ASDT bá FRETILIN iha ne’ebé simu mós segundu jerasaun, Tenente jenerál Lere Anan Timur.
Hafoin simu Lere iha CCF, atuál sekretáriu jerál FRETILIN, Mari Alkatiri orienta kedas hodi permite Lere atu halo nia kartaun militante.
‘’Loron ohin importante tebes bá vida Fretilin, tambá husi ne’e bá oin, la’ós ona manan metin maibé hamri’ik metin, tambá hetan kontribuisaun husi Lere ne’ebé hamutuk ho ita, nune’e ha’u husu atu bele hakat kedas hodi hasai fotografia no kartaun militante,’’ Dehan Alkatiri, iha CCF, Komoro, Sexta-Feira ohin, 20/05/2022.
Hafoin ida ne’e, Lere ne’ebé akompaña husi nia espoza hakat kedas bá fatin hasai kartaun militante tambá durante tinan 20 hafoin independénsia, Lere Anan la hetan kartaun militante ho razaun sei serví militár to’o reforma iha tinan 2022, maibé biar nune’e iha deklarasaun barak, sempre temi ‘’Ha’u Fretilin nafatin’’, Katak Lere.
Husi fatin hasai kartaun, fila-fali mai, hodi hetan mós sertifikadu rekoñesimentu nu’udár membru CCF ne’ebé tuir lolós realiza iha tinan 2015 maibé tambá iha vida militár, la konsege distribui.
Distribuisaun sertifikadu rekoñesimentu, diretamente fó husi atuál sekretariu jerál Fretilin, Mari Alkatiri parante militante no membru CCF, inklui Prezidente partidu Fretilin, Franscisco Guterres Lú Olo ne’ebé foin husik ona nia kargu nu’udár Prezidente repúblika 2017-2022, no kovidadu sira mai husi partidu PLP, KHUNTO no Os Verdes de Timor.
‘’Ha’u kontente tebes ho rekoñesimentu ida ne’e’’, Afirma Lere hafoin simu sertifikadu rekoñesimentu.
Além ida ne’e, iha sede CCF, Fretilin mós simu hikas nia prezidente partidu, Francisco Guterres Lú Olo ne’ebé durante tinan 5 la hala’o nia funsaun tambá simu kna’ar husi povu sai prezidente repúblika.
(REMATA).
loading="lazy" />