Funu Entre Ukraina no Rusia, Ramos-Horta Koalia Ona Ho Amérika No Sei Kontinua

Jornalísta : Arménio //

G-RTV.com (Dili) : Bainhira partisipa atividade konsolidasaun Kandidatura Prezidente Repúblika 2022-2027, Iha Suku Kampung-Alor, Taibessi no Maskarinhas, José Ramos Horta koalia mós konabá kazu funu entre nasaun Ukrania ho Rusia.

‘’Horseik ha’u koalia ona ho Amérika, sira husu ha’u nia hanoin, ohin kalan tuku 10, ha’u sei koalia iha konferénsia Internasionál liu husi Zoom Meeting konabá kazu Ukraina no Russia’’, dehan kandidatu Prezidente husi CNRT, Ramos-Horta, iha konsolidasaun refere ne’ebé hala’o iha Domingo ne’e, 27/02/2022.

Premiadu Nóbel bá Paz Afirma liu tan, Zoom Meeting ho Amérika atu hakotu funu ne’e, nia mesak ho Amérika no kontinua ohin kalan ho ema barak.

‘’Horikalan ha’u mesak koalia no sira rona de’it (Amérika), ohin sei kontinua koalia ho ema barak konabá kazu funu ne’e’’, kontinua Horta.

Konabá assuntu lolós iha Zoometing ne’e, parte G-RTV.com tenta hela Eis-Prezidente Repúblika ne’e maibé seidauk fó resposta.

Antes ne’e, líder nasionál, ajuda Guvernu hodi koalia ho nasaun barak inklui Amérika konabá ajudu sira mai Timor liu-liu luta ba Covid-19 iha Timor Leste.

‘’Ha’u mós ajuda guvernu, maske la konkorda, hau koalia ho ema iha liur atu haruka Vasina, maske Amérika konsidera Covid-19 iha TL ne’e ki’ik tebes’’, Deklara kandidatu ho númeru sorteiu 14 ne’e.

Entretantu, kazu funu Entre Ukraina no Russia hetok sai manas liu tan iha loron tolu ikus ne’e, hamate ona populasaun barak, mundu internasionál inklui líder mundiál sira, oras preokupa ho nasaun rua ne’e nia kazu ne’ebé iha intesidade bo’ot hodi hamosu tan guerra mundiál bá III. (REMATA).