G-NEWS (DILI) – Administrador Postu Vera Cruz seidauk simu informasaun husi Prezidente Autoridade Munisipiu Dili, kona-ba realiza atividade ba komemorasaun loron restaurasaun Independênsia 20 de maiu.
Administrador Postu Vera Cruz Manuel Gusmão hateten, kona-ba selebrasaun lorin 20 de maiu to’o agora seidauk iha informasaun kona-ba atu hala’o atividade sira, sei iha loron Eleisaun Parlamentar.
” To’o agora ami seidauk simu informasaun ida Prezidente Autoridade Munisipiu Dili, atu hala’o atividades sira hodi komemora 20 de maiu”, tenik nia iha Edifisiu Postu administrativu, Vera Cruz, Dili, Kinta-Feira (11/05/2023).
Nia dehan, iha ona Komisaun ida maibé Munisípiu Dili mak toma konta atu halo de’it serimónia simples, depois serimónia ne’e termina kontinua kedan ba distribuisaun ekipamentus sensitivus Ba sentru votasaun sira.
” Sira mos foin atu fó orientasaun ba Autoridade Lokal Suku sira atu apela ba komunidade sira atu dada bandeira iha ida idak nia uma. Tanba loron boot ida nee, ita hanesan komunidade atu hasae bandeira iha fatin sira liu liu iha uma”, Dehan nia.
Iha sorin seluk, Xefe Suku Vila Verde Abdul Mankoli hateten, komunidade barak mak iha ona konsiensia hasae ona bandeira RDTL iha ida-idak nia uma.
“Maske agora dadaun ita mós iha hela situasaun ba tempu kampanha nian, Ita nia komunidade balu mak hasae bandeira partidu, no balun hasae ita nia bandeira RDTL”, nia termina.
Jornalista : Ekipa G-News
Editór Testu : Amito Qonusere Araújo
loading="lazy" />