G-NEWS (MANUFAHI) – Administradór Munisípiu Manufahi (AMM), Komandante operasaun protesaun sivíl (APC), hamutuk ho ekipa autoridade Munisípal, tersa-feira ohin (09/05), sa’e tratór hodi observa direta komunidade afetadu husi korénti mota laklo iha aldeia Kolokau postu Alas munisípiu Manufahi.
Administradór Arantes Isaac Sarmento hateten, ohin ho ekipa protesaun sivil lori apoiu emerjénsia apoiu vítima sira, no observasa kondisaun uma Komunidade ne’ebé afetadu husi korénti mota.
“Komunidade kada tinan sempre hasoru inundasaun ne’e, governu Munisípiu hato’o ona pedidu ba ministériu obras públika atu aumenta halo konstrusaun ba ba barajem mota ne’ebé ita harii tiha ona, inklui halo pedidu ba institutu jestaun ekipamentu (IGE,IP), atu normaliza mota laklu nune’e hodi salva komunidade sira, maibé to’o ohin loron la iha solusaun komunidade kontinua hasoru problema hanesan kada tinan, “Arantes subliña”.
Nia informa, Governu Munisípiu kontaktu ona ho IGE urjente normaliza lalais mota Laklo hodi salva komunidade sira, tanba komunidade la ejiji apoiu emerjensia, maibé ejiji liu normalizasaun mota Laklo, tanba ne’e, Autoridade Munisípal sei aprezenta relatóriu ba Ministru Administrasaun Estatal atu husu apoiu orsamentu kontijenti, hodi halo projetu emerjésia konstrusaun ba barajen mota Laklo.
Entertantu ekipa konjunta apoiu emerjénsia, kompostu autoridade protesaun sivil, bombeiros, F-FDTL, Polisia, Saúde, kontinua evakua familia afetadu husi aldeia Kolokau ba sede suku Umaberloik, tanba udan kontinua bo’ot no volume korénti aumenta bo’ot.
To’o nutisia ne’e públika l, autoridade sira kontinua halo Evakuasaun ba komunidade afetadu sira husi sira nia hela fatin ba sede suku Umaberloik.
Jornalista : Júlio Guterres
Editór Testu : Amito Qonusere Araújo
loading="lazy" />