Guvernu Apoiu Konstrusaun Uma-Lulik, Uma-Lisan Tutuhafa-Maluhira Agradese

G-RTV.com (DILI) : Polítika Guvernu da-VIII ne’ebé lidera husi Primeiru Ministru Taúr Matan Ruák atu prezerva  patrimóniu kulturál, nune’e liu husi Sekretáriu Estadu Arte no Kultura (SEAK) hala’o lansamentu ba apoiu prezervasaun uma-lulik, grupu industrias kretiva kulturais, no grupu kulturál Komunitária

‘’SEAK Implementa programa Guvernu Da-VIII, konabá polítika prezervasaun patrimóniu kulturál, nune’e hahu distribui apoiu ho faze primeiru ba benefisiáriu ho kategoria uma-lulik hamutuk 42, grupu kulturál hamutuk 13, ho nia montante orsamentu hamutuk dollar rihun rua sanolu resin lima  ba grupu benefisiáriu sira hotu’’. Hateten SEAK, Teófilo Caldas hafoin serimónia lansamentu, Sexta ne’e.

Guvernante ne’e, esplika liu tan, apoiu refere ho nia objetivu atu prezerva kulturál liu-liu uma-lulik tambá nia sai sentru ba ema hotu atu halibur malu tuir lisan.

‘’Objetivu apoiu ne’e atu prezerva patrimóniu kulturál, liu-liu uma-lulik, tambá uma Lulik hanesan sentru kulturál hodi halibur ema hotu husi jerasaun ba jerasaun no promove moos turrízmu kulturál’’. Esplika Nia.

Teófilo esklarese tan, rekézitus ne’ebé SEAK iha mak konstrusaun uma-lulik tenke %100 mai husi material tradisionál no progressu konstrusaun máximu %90.

‘’Atu hetan benefísiu husi apoiu SEAK nian tenke tuir rekézitus sira hanesan materiál konstrusaun bá uma lulik ho tipu tradisionál no orizinál, uma-lisan ka família uma-lulik nian tenke iha ona progressu konstrusaun husi %0 to’o %90 la’ós apoiu mak foin halo konstrusaun inísiu’’. Esklarese Membru Guvernu ne’e.

Ba G-RTV.com, reprezentante benefisiáriu nu’udár kordenadór Lia-na’in husi Uma-lisan Tutuhafa-Maluhira, João Florindo De Jesus, agradese bá guvernu ne’ebé fó apoiu ona, no komprometidu atu utilija osan ne’e ho diak to’o nia finalidade.

‘’Hanesan benefisiáriu bá apoiu ne’e, agradese ba guvernu da-VIII liu-liu ba SEAK, no ami komprometidu atu responsabiliza hodi utiliza didiák osan ne’ebé fo bá ami, to’o nia finalidade no hatama relatóriu mai guvernu ‘’. Haktuir Lia-na’in ne’e.

Uma-lulik Tutuhafa-maluhira, tuir fontes katak, lokaliza iha Postu Administrativu Luro Villa (Lautém), hala’o ona konstrusaun hahu kedas iha tinan 2017 no atinje ona % 80 resin, no tuir planu, iha fulan tolu mai tan bele finaliza no  inagura.

Iha Serimónia lansamentu ne’e,  marka prezensa husi Ministériu Ensinu Superior, Siénsia no Kultura (MESSK), SEAK, no reprezentante benefisiáriu sira ho vestuáriu ne’ebé hafutar ho Táis tuir kór kada uma-lisan.

Jornalista : Arménio.