Hafoin Hasoru Horta No Alkatiri, PDRT Deside Ona Apoiu Kandidatu Ida

Jornalísta : Arménio //

G-RTV.com (Dili) : Hafoin rona apuramentu finál husi STAE konabá rezultadu eleisaun prezidensiál 2022 (ELPREZ), hatudu entre kandididatu prezidente (KaPREZ) na’in 16, la iha ida mak liu % 50+1, hodi sai vensedór.

Nune’e, iha possibilidade sei obriga atu ba segundu ronde ho kandidatu na’in rua entre manan na’in primeiru no segundu ho votu maioria simples.

Iha kandidatu na’in rua mak oras ne’e dadaun tama iha lista segundu ronde mak José Ramos-Horta husi CNRT ho totál apuramentu 301481 (% 46,58) votu no kandidatu, Francisco Guterres Lú-Olo iha pozisaun da-ruak ho totál apuramentu 143408 (%22,16) votu.

Tamba ne’e iha loron hirak ne’e nia laran, movimentu kandidatu sira ne’ebé la passa iha segundu volta inklui partidu polítiku balun hahu halo movimentasaun hodi fihir kandidatu ne’ebé avansa ba segundu ronde atu apoiu.

Partidu Democrático Republicano de Timor (PDRT) ne’ebé konkorre iha ELPR 2022 ho nia kandidatu rasik, Anacleto Ferreira ne’ebé iha klassifikasaun da-6 tuir apuramentu nasionál ho totál votu 13059 (%2,02), hala’o mós nia komunikasaun polítika entre Kandidatu Horta no Lú-Olo.

Iha loron 22/03, PDRT ne’ebé lidera husi Agustinho Gomes akompaña husi kandidatu Anacleto hala’o komunikasaun polítika direta ho José Ramos-Horta iha gabinete Faról no loron tuir mai (Ohin, 23/03) parte dadér, hasoru malu ho Marí Alkatiri nu’udár sekretáriu jerál FRETILIN ne’ebé apoiu totál kandidatu Francisco Gueterres Lú-Olo.

‘’Ohin desijaun iha tiha ona, maibé antes ne’e ita rona programa husi kandidatu Horta husi CNRT no Lú-Olo husi FRETILIN nian ohin dadér, iha possibilidade bo’ot ba kandidatu ida tambá maioria husi estrutura nasionál to’o munisípiu, apoiu kandidatu entre na’in rua ne’e ida’’, Deklara Sekretáriu Jerál PDRT, Matias Borromeu liu-husi Telefone ba G-RTV.com hafoin partisipa enkontru iha Sede nasionál PDRT (DILI), Kuarta ne’e, 23/03/2022.

Atu anunsia rezultadu enkontru ohin, entre estrutura nasionál no munisipál sira, ne’ebé hala’o kuaze oras 6, tuir informasaun, sei anunsia bainhira iha ona komunikasaun ho partidu ne’ebé apoia ho kandidatu entre nain rua ne’e ida.

Tuir observasaun, deskonfia, PDRT deside ona atu apoiu kandidatu ho númeru sorteiu 14, José Ramos-Horta ne’ebé  indijita husi partidu CNRT. (REMATA).