G-NEWS (DILI) – Joven ida hosi Suku Katrai Leten, Postu Letefoho Munisípiu Ermera ne’ebé mout iha Bee debu iha Lauana, hetan ona hosi ekipa Bombeirus, Autoridade Seguransa no família sira iha Munisípiu Ermera, hafoin matebian mout durante óras 17 nia laran.
Tuir kronolójia, matebian ho identidade kompletu Vasco dos Santos Maia, mout iha tuku tolu lorokraik (Tersa-Feira, 07032023), no hetan fali mate isin iha Kinta-Feira tuku sanolu dáder. Família matebian informa ba G-News liuhosi telefone katak, matebian Vasco sai hosi uma ho intensaun atu ba kuru bee, hanesan servisu bain-bain ne’ebé nia halo hafoin sai hosi oras eskola nian.
Kuandu Vasco la fila hanesan bain-bain, família sira preokupa, nune’e família sira koordena ho ho autoridade seguransa, ekipa Bombeirus hodi buka tuir Vasco iha Bee Debu Lauana ne’ebé pertense ba sira nia suku.
Família no populasaun sira iha Suku Katrai Leten Postu Letefoho sente triste ho akontesimentu ne’e, nune’e sira husu ba labarik no joven sira iha Lauana tomak, atu kuidadu bainhir asesu lagoa refere. Nune’e mós informa ba família hotu-hotu iha suku refere atu kuidadu no fó atensaun másimu ba labarik sira atu labele sai vítima, hanesan Matebian Vasco enfrenta.
To’o informasaun ne’e fó sai, G-News seidauk hetan informasaun hosi akontesimentu ne’e hosi Autoridade Seguransa Munisípiu Ermera.
Jornalista : Ekipa G-News
Editór Testu : Amito Qonusere Araújo
loading="lazy" />