Horta inagura, Dom Virgilio fó bensaun ba eskola Internasionál iha Manufahi

G-NEWS (MANUFAHI) – Prezidente Repúblika, José Ramos-Horta, inaugura Segunda-Feira ne’e, Pré Eskolar International School Santa Bakhita iha Munisípiu Manufahi, no hetan bensaun hosi Arcebispo Metropolitanu, Arkidioseze Díli Don Virgílio Cardeal do Carmo da Silva.

“Edukasuan hahú kedas hosi pré primáriu, iha Timor-Leste, porsentu 60 kosok-oan, tinan 3 to’o tinan lima, la ba ensinu pré escolar, tama ho 5 anos, 7 anos tan, baihira ita ba ensinu primáriu labarik sira preparadu los,” Hateten Xefe Estadu.

Prezidente Repúblika haktuir katak, sei aprezenta ba governu foun, medida kombate sub-nutrisaun, liu-hosi kriasaun pré-eskolar.

“ Tinan liu ba ne’e, servisu hamutuk ho espesialista balun ho apoiu hosi UNICEF prepara proposta ida atu entrega ba governu foun, para hare programa Pré-Escolar, para kombate mós sub-nutrisaun no stunting, katak kuandu inan rasik la iha saúde, bainhira labarik moris, la iha inan nia susu-been, la fó inan nia susu-been, inan nia susu been mós tenke liu ho hijiene, ijiene inan rasik nian, ijiene iha uma laran”, tenik Xefe Estadu.

Ba Xefe Estadu, presiza promove nafatin kampaña susu-been inan nian, hodi ajuda kombate sub-nutrisaun.

“Kampaña bo’ot tenke halo ba ijiene, iha Timor-Leste tomak, kampaña bo’ot ba breastfeeding maihosi husi inan, pelumenus fulan neen hemu de’it inan nia susu-been, fulan neen liu tiha, bele kahor ho buat seluk, tuir rekomendasaun husi espesialista sira, tinan tolu tenke ba ona Pre-Escolar, ne’e mak baze ba futuru”

Konstrusaun eskola ne’e, bazeia ba pedidu husi Prezidente Repúblika ba Fundasaun Better husi Austrália hodi hari’i eskola ida ho kualidade, ho kurríkulu nasionál hanesan baze no Austrália nian, hodi hanorin estudante na’in 50 ho lian tétum, ingléz no portuguéz.

“ iha ne’e la bolu pré primáriu, bolu fundasaun, hahú kedas air in, kuandu sira to’o ona elementáriu, kualidade loos ona, hatene ona tétun, Portuguéz, inglés, kuandu hahú primáriu depoiz, to’o sekundáriu, ba oin sei halo negosiasaun ho Igreja para aumenta , sei halo mobilizasaun finansiamentu iha liur para loke iha fatin seluk”

Tuir planu, Xefe Estadu sei ba Austrália iha fulan Outubru tinan ne’e, hodi halo angariasaun ba kriasaun iha Timor-Leste hodi garante eskola ba labarik no joven sira nia futuru, ho kualidade.

Jornalista     : Ekipa G-News
Editór Testu  : Amito Qonusere Araújo