Jornalísta : Arménio //
G-RTV.com (Dili) : Xefe estadu Timor Leste José Ramos-Horta kontinua kondena makaas no buka atu investiga ajénsia sira ne’ebé ilegalmente haruka traballadór bá servisu iha rai-liur inklui Alemaña no Dubai.
‘’Ha’u pessoalmente buka investiga situasaun sira ne’ebé akontese iha alemaña, bainhira ha’u simu informasaun diretamente husi ha’u nia E-mail, ha’u kontaktu kedas sira iha Alemaña no sira konsege kontaktu grupu ne’e. akontese iha alemaña no Dubai, grupu ne’ebé illegal Iha Timor, bosok ema sira ne’e, iha servisu bá rai sira ne’e, haruka sira ba maibé kontratu sira ne’e mesak falsu de’it,’’ Espressa Horta iha nia vizita bá Heineken Hera, Kinta ohin, 23/06/2022.
Nune’e Prezidente Repúblika, fó aviza bá Timor-oan sira inklui jóvem sira atu la’o tuir Lei liu-liu liu husi ajénsia offisiál sira ne’eb’e Iha Timor Leste.
‘’Aviza bá jóvem sira hotu, atu bá servisu iha rai-liur tenke tuir Lei, liu husi ajénsia offisiál duni iha Dili, hanesan Incanto Group ne’eb’e sei haruka bá Dubai, maibé to’o oras ne’e seidauk realiza, rai-seluk ne’e kuidadu,’’ Dehan Premiadu Nóbel bá Páz ne’e.
Iha sorin seluk, Polísia Ciêntifica Investigação Criminal (PCIC) iha loron kuarta ne’e, kaptura ona sidadaun balun ne’e loke ajénsia no haruka traballadór bá rai-liur liu-liu b’a Dubai ne’eb’e oras ne’e sai problema.
Entertantu, Timor-oan lubuk ida hala’o servisu ona iha Portugál liu husi ajénsia privadu sira maibé tuir Ministériu Negósiu Estranzéiru Timor Leste sei husu investigasaun tambá traballadór balun to’o oras ne’e la hetan tratamentu dignu iha Portugál. Nune’e moos embaixada Portugál iha Dili la iha koñesimentu ruma konabá Timor-oan sira ne’ebé oras ne’e servisu hela iha Portugál.
(REMATA).
loading="lazy" />