G-NEWS (DILI) – Relasioná ho kaderneta passaporte Timor ne’ebé lakon, tuir deklarasaun Ministru Justisa foin lalais ne’e, maibé to’o oras ne’e Komisaun Anti Korupsaun (CAC_Sigla Portugés) seidauk simu keixa ofisial hosi públiku, no sei konsidera hanesan notísia krime ida.
Komisariu Adjuntu ba Asuntu Prevensaun no Sensibilizasaun Luis de Oliveira Sampaio, ba G-News (Kinta-Feira, 16032023) esplika, informasaun ne’ebé públiku relasiona ho assuntu ne’e hanesan notísia krime.
“Primeiru ida ne’e hanesan notísia ida, maibé prosesu internal ami fiar katak, senhor Ministru sei hola medidas atu buka hatene kauza ka lori to’o ho konkluzaun ida katak kaderneta passaporte lakon to’o númeru ida bo’ot hanesan ne’e”, Eis Diretór Ezekutivu JSMP esplika.
Tuir Nia, normalmente kuandu investigasaun internal mak la ba, Ministru Justsa hatene dalan saida mak nia tenke halo. Ezemplu Nia tenke remete kazu ne’e ba Ministériu Públiku ka KAK para hodi prosesa, depende ba Ministru ninia eskolla.
Entaun kuandu notísia krime ne’e tama ba mai, KAK bele loke kedan prosesu.
“Tanba ita akompanha deklarasaun Ministru nian, ita mós akompanha deklarasaun hosi Diretór Diresaun Nasionál Rejistu no Notariadu, nia klarifika hela pontu balun, tanba ne’e mak ita fiar katak prosesu internal ne’e lao lai, depois notísia ne’e sai hanesan ne’e, automátikamente sei iha follow-up. Agora follow-up ne’e depende prosesu hosi interna Ministériu nian atu deside ba ne’ebé”, Adjuntu KAK ne’e klarifika.
Kuandu iha investigasaun internal kona-ba kazu Kaderneta Passaporte Timor lakon rihun 150 iha Ministériu Justisa, Diresaun Jerál Servisu Rejistu Notariadu (DJSRN) identifika iha indisius krime, sei submete ba Ministériu Públiku ka Komisaun Anti Korupsaun hodi loke prosesa foun.
Komisaun Anti Korupsau sei loke prosesu foun ba kazu ne’e, bainhira identífika iha nota indisius ba krime.
“Mais persepsaun públiku kona-ba kazu ne’e, ne’e iha tendénsia ba mal-jestaun, abuzu-poder, no krime relevante seluk ne’ebé bele akontese”, Adjunto KAK ne’e hakotu.
Jornalista : Ekipa G-News
Editór Testu : Amito Qonusere Araújo
loading="lazy" />