Iha FSS, Horta Promete Sei Hatur Órdem Konstituisaun

Jornalísta : Arménio //

G-RTV.com (Dili) : Kandidatu Prezidente Repúbliku 2022-2027, Premiadu Nóbel ba Paz, José Ramos-Horta sai oradór iha semináriu ne’ebé organiza husi Fakuldade Siénsia Sosiais (FSS), Universidade Nasionál Timor Lorosa’e (UNTL).

Semináriu ho tema ‘’Repõem Órdem Constitucionais e Instituções Democraticas’’, kandidatu ho númeru sorteiu 14 ne’e, ba estudante FSS, sei kompromete hodi hatur fali órdem konstitusionál.

‘’Ha’u kompromete sei halo diálogu nasionál ho partidu polítiku sira hodi hatur fali órdem konstitusionál atu hadia futuru povu no nasaun nian’’, afirma Ramos-Horta iha semináriu nasionál ne’e, Kampuz FSS (Dili), Kuarta, 23/02/2022.

Razaun husi afirmasaun ne’e, eis-Prezidente Repúblika esplika, polítika ne’ebé agora akontese iha Timor Leste, tenke resolve ho matenek no ulun malirin atu labele hamosu krize.

‘’Atu restaura fali lejitimidade no funsionamentu normál órgaun Guvernu ne’ebé dezde 2020 la funsiona ho di’ák, ikus mai rezulta ekonomia hakdasak, no sei reforma mós sistema judisiáriu nune’e bele garante funsionamentu Lei no Órdem iha Timor Leste’’, Hatutan Horta.

Bainhira kestaun sira ne’e rezolvidu, Horta fiar katak sei servisu hamutuk ho guvernu hodi atinje estadu tomak  nia objetivu atu dada kadoras mai Timor Leste no lori povu sai husi kiak no mukit.

Iha fatin hanesan, Dekanu FSS-UNTL, Camilio Ximenes de Almeida, hato’o agradese ba tempu tomak Laureadu Nóbel bá Páz.

‘’Agradese bá Laureadu Nóbel Bá Paz José Ramos-Horta nia tempu, hodi fo palestra ba estudante sira atu kadi liu tan estudante sira nia kapasidade hodi hatene klean liu tan vizaun no missaun Kandidatu Prezidente Repúblika iha tinan lima oin mai’’, lia agradesimentu husi Dekanu.

Iha eventu ne’e, partisipa husi estudante kuaze 100 resin ne’ebé maioria mai husi estudante FSS no akompaña husi Dosente sira.

Entretantu, tuir planu FSS-UNTL sei kontinua organiza semináriu refere hodi bolu kandidatu sira hotu atuaprezenta sira nia missaun no vizaun tuir tema ne’ebé iha. (Remata).

Horta ne’ebé Hamriik no kaer Mikro akompaña husi Dekanu FSS hodi hato’o nia palestra ba Estudante sira // Foto : Esploridu.