Iha Lospalos, Kandidatu PR Horta Hala’o Abertura Kampaña, Xanana Dezafia Militante

Jornalísta : Arménio //

G-RTV.com (Lautém) : Kandidatu Prezidente Repúblika (PR)  2022-2027, José Ramos-Horta ne’ebé akompaña husi prezidente CNRT, Kay Rala Xanana Gusmão hala’o abertura kampaña iha munisípiu Lautém, Postu-Administrativu Lospalos-Villa, tersa ne’e.

Iha komísiu ho komunidade no simpatizante sira, Premiadu nóbel ba páz hahu ho komprimentus ba kandidatu sira seluk ne’ebé iha loron hanesan hala’o mós nia kampaña prezidensiál.

‘’Ha’u hahu ho komprimentus ba kandidatu sira idak-idak, ha’u hato’o votu sussesu ba sira nia kandidatura, ha’u respeitu sira’’, dehan Horta ho númeru sorteiu 14 iha kampu Futeból 745, Suku Fuiloro (Lospalos-villa), 02/03/2022.

Hafoin, kontinua esplika kronolozia krize konstitusionalidade ne’ebé konsidera mosu iha tinan lima ikus ne’e ba partisipante sira iha komísiu.

‘’Krize konstitusionál iha rai-ida ne’e la’ós ema seluk mak hahu, nia hahu bainhira atuál prezidente repúblika (PR) la fó posse ba membru guvernu CNRT na’in 9 no KHUNTO na’in rua, ida ne’e fo inpaktu bo’ot ba dezenvolvimentu tambá guvernu la kompleta, lolós, la’ós PR nia kompetensia atu la fó posse, kontinua ho forma guvernu ne’ebé la liu husi kongressu tuir ezizénsia PR nian’’ , esplika eis-reprezentante Sekretáriu Jerál ONU ne’e.

‘’Sei servisu metin ho guvernu, parlamentu, sosiedade sivíl no komunidade internasionál atu haklean demokrasia, hametin demorasia, hatun kiak sira, hadia kosok –oan ho nia inan sira, hadia juventude sira nia moris, hare eskola ho nutrisia, desportu, Servisu ho arte-marsiais, arte kultura sira atu sira sai ajente bá dame, sira rasik bele kontribui ba rai ne’e nia páz’’, Afirma Horta bainhira eleitu sai Prezidente Repúblika hodi respond e ba aktu violasaun konstitusionál.

Iha fatin hotu, eis-prezidente repúblika ne’e, sempre akresenta konabá aktu inkonstitusionalidade no tuir ’’kontratu polítiku’’ ho CNRT, missaun da-uluk mak dizolve parlamentu nasionál.

Iha fatin hanesan, líder nasionál no prezidente partidu CNRT, Kay Rala Xanana Gusmão, husu ba militante sira hotu atu kontinua ‘’dor to dor’’  hodi vota ba númeru sorteiu 14 ne’e.

‘’Tambá kadidatu ida ne’e ita nian, ita hili liu husi konferénsia nasionál, dever bo’ot ida mak kada militante ida buka husi ‘’dor to dor’’, tenke ema ida lori 5, tambá ita iha krize bo’ot ida, ita tenke hases labada’en, salva ita nia estadu direitu demokrátiku’’ , dezafiu ne’ebé Xanana fó ba militante.

Entretantu, tuir observasaun, antes Kandidatu hamutuk ho Kay Rala Xanana Gusmão to’o iha fatin, populasaun inklui militante partidu CNRT, partidu apoiante, simpatizante no movimentu ne’ebé ezíste iha munisípiu hamutuk 9, kuaze 2000-resin ne’ebé mai husi postu-administrativu 5 konsentra no hakonu kampu futeból demokrasia.