G-RTV News (12/05/2021): Sentru Saúde Klínika (SSK) Komoro relata konabá kazu moras ne’ebé rezista ho númeru ás iha fulan Janeiru 2021 to’o Abríl tinan ne’e.
Tuir Diretora SSK Komoro Emilia Ayati de Sousa, informa katak moras ne’ebé rezista ho númeru ás mak Infesaun Respiratóriu, Moras Kulit no Diária.
‘’Durante fulan tolu ikus ne’e, moras ne’ebé rezista ho númeru ás iha SSK Komoro mak hanesan Infesaun Respiratóriu, Moras Kulit no Diária’’ informa diretora ne’e iha nia kna’ar fatin SSK Komoro, Munisípiu Dili, Kuarta-Feira ne’e.
Kauza husi moras tolu ne’e, parteira ne’ebé lidera SSK Komoro, esplika katak, tamba iha fulan balun liu bá mosu inundasaun nune’e provoka mós moras sira ne’e akontese.
‘’Kauza husi Infesaun Respiratóriu, Moras Kulit no Diária ne’e, maoria tamba foin lalais inundasaun ne’ebé akontese no kondisaun moris ne’ebé la iziene inklui ho konsumu bee ne’ebé la moos’’. Haktuir Diretora ne’e.
Dadus ne’ebé diretora fo sai katak moras Respiratóriu husi fulan Janeiru to’o Abríl 2021, hamutuk 17.383, Moras Kulit ho totál 4801, ho moras Diária hamutuk 4592.
Jornalista : Rosa Carvalho.
Editór : Arménio.
loading="lazy" />