G-RTV News (21/05/2021): Akontesimentu Inundasaun Iha loron 4 Fulan Abríl Tinan ida ne’e, lori sofrimentu lubuk ba sidadaun rihun resin tamba balun lakon membru família, sasan, no uma, até agora, balun sei kontinua refuzia iha kampu refuziadu ne’ebé ezisté.
Sofrimentu ida ne’e, mosu moos ba família Ambrósio Sequeira de Jesus hanesan sidadaun ai-leba ida ne’ebé hela iha aldeia Laulora, Suku Manleuana, Munisípiu Dili.
‘’Iha loron 4 fulan Abríl, foun-foun, ami sente udan babain, maibé udan, akompña ho anin, nune’e, liu tiha óras tuku 11 kalan, ha’u ho ha’u nia fen fanu malu hodi hader, tamba fuan la hakmatek’’. Ambrósio konta nia istória iha nia hela-fatin ne’ebé provizóriu, Kinta-Feira ne’e (21/05).
Aman ba oan na’in haat ne’e, kontinua nia istória moruk ida ne’e ho oin triste katak sira trauma nune’e ho família evakua kedas ba fatin seguru.
‘’Óras halai bá tuku 4 madruga, ha’u nia-oan mane, sai ba hare, rai komesa mamar ona, fatuk sira tun dadaun, ai sira komesa bo’ok-an atu monu, ho trauma, entaun ami tenke evakua lalais ba viziñu nia uma tamba ami nia uma besik atu monu’’ Espressa nia.
Iha Viziñu nia-uma ne’ebé sei mamuk, satan netik Ambrósio ho família durante semana tolu maske iha de’it varanda.
‘’Bainhira hare katak rai komesa monu, uma ne’ebé ami hela moos monu totál ona, ha’u ho família halai ba viziñu nia uma, Iha ne’ebá, ami konsege satan ami nia-an durante semana tolu, maibé toba de’it iha varanda.’’. Reforsa fontes ne’e.
Família ne’ebé mai husi munisípiu Ermera esplika moos uma ne’ebé antes mota lori.
‘’Uma ne’ebé ami hela antes ne’e, besik mota kuaze 15 metrus, didin ho kalém de’it to’o mota lori, maibé pedasuk sira ne’ebé sei iha, ami hili, hodi halo fali uma iha kotuk ne’e ho medida 3×3 de’it’’. Haktuir nia.
Aman aileba ne’e la haluha agradese moos ba entidades sira ne’ebé apoiu ona nia no afetadu sira seluk.
‘’Hafoin akontesimentu, entidades privadu (pessoál), Guvernu no kompañia balun, konsege ajuda ona ami, ba ida ne’e ami agradese tebes, inklui uma na’in ne’ebé oferese ona varanda, maske bolu atu hela provizóriu iha uma-laran maibé ha’u deside iha de’it liur, tambá situasaun mak obriga’’. Fo sai Ambrósio.
Tuir viziñu balun husi família ne’e klarifika, Ambrósio nia moris loron-loron mak hili ai-maran ba faan, no leba sarmalém hodi hale’u sidade Dili.
‘’Avô ne’e, moris mk ho de’it hili Ai-maran, no leba sarmalém hale’u Dili, liu-liu iha tempu eskola hodi sustena família no oan sira nia eskola’’. Viziñu fo sasin.
Observasaun iha terrenu, uma 10 resin mak hetan estragus husi inundasaun refere, iha area aldeia Laulora, inklui sede nasionál partidu Khunto moos ameansadu husi inundasaun iha tempu ne’ebá.
Jornalista : Júlio Paixão.
Editór : Arménio.
loading="lazy" />