‘’Haksolok ho servisu ne’ebé iha, aproveita oportunidade, agradese nafatin ba Moris’’ ne’e mak lia-motivasaun husi Isáac Tony Pereira dos Santos hanesan jóvem Timor-oan ida ne’ebé hakna’ar-an iha Restaurante ida iha Komoro, Munisípiu Dili.
Mane moreno ne’e, akaba nia ensinu sekundáriu iha tinan 2016 no tamba moris, hili dalan hahu servisu iha restauirante refere iha tinan 2018, fulan Novembru.
‘’Bainhira remeta ensinu sekundáriu iha tinan 2016, altura ne’e, naran sai duni iha UNTL maibé hafoin husu ba família, sira deside atu ha’u hili dalan servisu tamba moris família nian’’. Haktuir jerasaun Aileu-Baukau.
Foinsa’e ho idade 23 ne’e, sai ona supervizór restaurante famózu ida ho naran Timor Lodge ne’ebé habo’ot ona nia kareira iha tinan rua ikus ne’e.
‘’Iha Restaurante Timor Lodge, ha’u sai hanesan supervizór durante tinan rua ikus ne’e, no se mak motiva ha’u to’o simu responsabilidade ida ne’e, mak família rasik, tamba husi sira, ita aprende, simu motivasaun, no habrani-an atu la’o ba oin’’. Espressa, ai-fuan domin husi Isáac Pereira (+) no Imaculada Sarmento.
Hatan konabá dezafiu sira, jovém ne’ebé la hatene kolen no la baruk atu aprende fo sasin katak normalmente ita labele ses, liu-liu servisu ne’ebé halo, iha krítika, maibé ida ne’e mak motiva ita.
‘’Konabá dezafiu, ita labele ses, liu-liu servisu ne’ebé ha’u iha, hetan krítika husi kliente no husi manajér rasik maibé ha’u konsidera hanesan dalan ida atu motiva no halo ita aprende liu tán atu hatudu ita nia professionalidade’’. Liafuan husi oan ba dala 7 husi maun-alin nain 13.
Remata konversa ho G-RTV News, fontes ne’e husik hela nia mensájem ba nia maluk jóvem sira seluk katak labele moe ho servisu saida de’it mak iha.
‘’Husu ba belun jóvem sira labele moe ho servisu saida de’it ne’ebé iha, a não ser ita naók, tamba ne’e lalika moe atu halo buat ruma ne’ebé fo benefísiu ba ita’’. Klarifika husi fontes ho naran estimadu Tony.
Jornalista : Julio Paixão.
Editor : Arménio.
loading="lazy" />