Selebra Idul Fitri, PR No PM Parabeniza Komunidade Musulmanu

Jornalísta : Arménio //

G-RTV.com (Dili) : Prezidente Repúblika (PR) no Primeiru Ministru (PM) parabeniza komunidade musulmanu iha âmbitu selebrasaun loron vitória IDUL FITRI 1 SYAWAL 1443 Hijrih, ne’ebé hala’o iha Meskita An’nur.

‘’Aproveita loron espesiál, ohin, atu husu dala ida tan ba sidadaun sira, fó liman bá malu, nu’udár Timor-oan no tanen hamutuk prinsípiu no valór sira ne’ebé hametin ita nu’udár pov ida de’it, moris iha uma lisan ida de’it, ha’u nia hakoak bo’ot espesialmente ba komunidade musulmanu tomak iha Timor, no rai seluk,’’ Dehan PR, Francisco Guterres Lú Olo iha nia mensájem ne’ebé hato’o husi Diretór jerál gabinete prezidensiál, Dominggos Amaral, iha Meskita An-Nur, Kampung Alor (Dili), ohin, 02/05/2022.

Dominggos hatutan tan, PR atuál sei remata nia mandatu iha fulan ida ne’e, maske nune’e, Lú Olo sei kontinua apoiu ema hotu nu’udár  servidór nasaun hamutuk ho kompatriota sira tuir kbi’it no matenek ne’ebé iha hodi hametin estadu direitu demokrátiku, kuda estabilidade, no hasa’e moris diák povu nian.

Iha fatin hanesan, PM Taur Matan Ruak, hato’o mós nia mensájem liu husi Koordenadór gabinete apoiu sosiedade sivíl-PM deklara ‘’Primeiru ministru hakarak hato’o nia parabéns no hakuak bo’ot no felís Idul Fitri nian bá família musulmanu iha Timor Leste tomak,’’ Deklara Filipe Da Costa.

Nia esklarese, razaun ne’ebé PM la partisipa tambá iha ajenda seluk ne’ebé hala’o mós iha oras  hanesan no fontes ne’e konfirma, kada tinan guvernu liu husi gabinete apoiu sosiedade sivíl sempre apoiu no tau osan ketak ho montante $500 míl ba atividade relijiaun sira inklui musulmanu iha Timor Leste nu’udár vontade guvernu nian.

‘’ Ohin ami simu loron ksolok, loron vitória Idul Fitri, ami nia esperansa bo’ot, kontinua reza nafatin ba líder sira, oinsa atu estabelese nafatin páz no estabilidade tuir fiar musulmanu hodi hametin relasaun entre ema ho ema no relasaun ema ho Maromak,’’ Espressa sekretáriu jerál Konsellu Nasionál Islamíco Timor Leste, Abdula Inacio Soares iha oportunidade ne’e.

Tuir observasaun, Selebrasaun Idul Fitri iha meskita An-Nur ne’e hetan partisipasaun máxima husi komunidade musulmanu iha kapitál Dili.

(Remata).