G-RTV.Com (DILI): Juventude Munisípiu Lautém ne’ebé kompostu husi postu-administrativu 5, deklara ho unanimidade liu husi konferénsia imprensa hodi apoia futuru kandidatu prezidente republika , atuál Tenente Jenerál Lere Anan Timur (LAT) atu kompete iha eleisaun prezidensiál 2022.
‘’Ami juventude husi munisípiu Lautém, hato’o ami nia apoiu tomak ba tenente Jenerál Lere Anan Timur atu kandidata-an bá Prezidente Repúblika períodu 2022-2027’’. Hateten porta-vóz Julião Guimaraes iha rezidénsia privadu Tenente Jenerál LAT, Sexta ne’e.
Juventude hirak ne’e, konsidera LAT hanesan maubere-oan ne’ebé komprometidu nia-an bá kauza ukun-rasik-an.
‘’Tenente Jenerál Lere nu’udár maubere-oan ne’ebé komprometidu nia-an bá ukun-rasik-an durante tinan 24 iha Ai-laran to’o ohin loron’’. Haktuir Julião.
Iha karta komunikadu ne’e, port-voz mensiona, LAT hanesan inspiradór ba juventude tambá tane-ás interese ema hotu nian.
‘’Ami sente inspiradu ho Tenente Jenerál nia lideransa ne’ebé hatudu durante ukun-an nia laran, no tane-as interese estadu, nune’e tempu ona atu nia kaer ukun hodi garante estabilidade guvernativa no dezenvolve Timor ba oin’’. Lian husi komunikadu ne’e.
Maske halo ona konferénsia Imprensa, maibé apoiante juventude sira ne’e, esplika moos katak seidauk iha konfirmasaun verbál husi futuru kandidatu rasik hodi foo sai nia prontidaun ba kandidatura.
Jornalista : Arménio.
loading="lazy" />