Kampaña Iha Dili, Horta Hatudu Sinál IX Guvernu, La Temi Troka Taur

Jornalísta : Arménio //

G-RTV.com (Dili) : Kandidatu Prezidente Repúblika (PR)  2022-2027, José Ramos-Horta ne’ebé akompaña husi prezidente partidu CNRT, Kay Rala Xanana Gusmão hala’o kampaña nasionál iha munisípiu Dili, Postu-Administrativu Dom Alexo.

Iha kampaña nasionál ne’e, kandidatu vensedór simples iha primeira volta ne’e, afirma, sei tau prioridade ba edukasaun hamutuk ho guvernu.

‘’Edukasaun tinan 5 mai ne’e sai prioridade númeru 1 inklui agrikultura tambá nia mak tane nasaun ida ne’e, Prezidente no Guvernu tenke kolabora bá ida ne’e,’’ Dehan Horta iha komísiu polítika, kampu Tasi-Tolu, 12/04/2022.

Maibé, bainhira atu atinji ida ne’e, Premiadu Nóbel bá Paz, hatutan, bainhira manan, sei hamosu XI guvernu  mai husi maioria no iha lejítimidade.

‘’Ne’e akontese, bainhira prizidente ne’ebé imi hili iha 19/04 mai ne’e, sei hili guvernu ida, ne’ebé lideradu hanesan Maun Bo’ot Kay Rala Xanana Gusmão, ne’e duni tenke hetan Guvernu maioria, lejítimu inklui IX tambá VIII la’ós guvernu konstituisionál,’’ Hatutam Nia.

Molok atu hamosu IX, tuir planu ne’ebé  G-RTV.com  assesu  husi JRH katak, sei hahu ho diálogu ho forsa polítika sira  ne’ebé durante ne’e’ ezíste iha Timor, atu hetan solusaun bá formasaun guvernu foun inklui lejitimidade parlamentu nasionál.

Ho afirmasaun ne’e, hatudu Sinál husi Horta ne’ebé sempre afirma iha fatin-fatin katak sei troka atuál VIII Guvernu bá IX tambá konsidera la iha lejitimidade no atuál prezidente repúblika ne’ebé hamosu violasaun konstituisaun.

Maske nune’e, tuir observasaun G-RTV.com, durante ne’e, Horta iha nia kampaña sira seidauk deklara konabá atu troka atuál primeiru ministru Taur Matan Ruak bainhira hamosu IX guvernu hodi buka lejitimidade guvernu no parlamentu nasionál.

Iha fatin hanesan, Prezidente Partidu CNRT, Kay Rala Xanana Gusmão, apela bá apoiante no militante sira ne’ebé apoia kandidatu JRH nian, atu hakmatek nafatin hodi simu rezultadu iha eleisaun ne’ebé sei akontese iha semana oin.

‘’Ha’u husu ba imi tomak, atu nafatin hakmatek, ses husi provokasaun sira, inklui iha loron votasaun to’o  rezultadu votasaun nian’’, apela Xanana.

Partisipa iha eventu polítiku ne’e, mai husi militante no simpatizante partidu polítiku ne’ebé fó apoiu ba Horta, inklui movimentu sira ne’ebé servisu ba vitória JRH.

Observasaun ba kampaña nian, husi CNE, sosiedade sivíl inklui observadór internasionál no asegura husi PNTL.

(REMATA)