Fen Hein Durante Fulan rua, Ikus mai La Bele ba Hakoi Laen, Tamba Pozetivu COVID-19.

G-RTV NEWS ( 31/03/2021) : Tamba Serka Sanitária no konfinamentu Obrigatóriu, nune’e regra ne’ebé fo sai husi Konselhu Ministru no SIJK aplika katak, atu hala’o viázem Munisipál sai husi Dili ba Munisípiu Seluk, tenke halo teste SWAB atu livre husi moras COVId-19 durante serka Sanitária sei válidu.

Iha loron 30/03/2021, óras 13:00 Aviaun CITILINK Voo Kualalumpur-Dili to’o iha aeroportu Internasionál Nicolau Lobatu. Viázem aviaun ne’e mai Timor Leste ho pasajeiru 162 inklui mate-isin Timor-oan ida.

Matebian Timor-oan ida ne’e, lori husi rai Englaterra, bainhira to’o iha Aeroportu, família ho laran triste ba hasoru matebian ne’e ho fotografia matebian nian.

Tuir identidade matebian ne’ebé G-RTV.COM assesu iha Uma-matebian, Luro-Mata ( Fatuhada), Dili (30/03),  katak matebian ho naran kompletu Domingos Maia Barreto (30), husi Munisípiu Bobonaru, ba iha Englaterra iha loron 16 Fulan Fevereiru Tinan 2020. La to’o tinan ida, matebian hakotu is iha loron 07 Fulan Fevereiru Tinan 2021.

Durante fulan rua, Timor-oan iha Englaterra hala’o solidariedade ba matebian refere hodi esforsu atu matebian bele to’o no hakoi iha nia rai moris fatin.

Maibé triste bo’ot liu hafalun Fen husi Matebian nian, ne’ebé durante fulan rua hein ho laran susar, atu nia laen bele mai, maibé akontesimentu ne’ebé la espera kona feto ida ne’ebé lakon nia parseiru Moris.

Tuir Família husi Matebian katak ‘’ Iha loron 29/03 Fen husi Matebian ba tuir teste SWAB atu akompanha nia Laen to’o hakoi iha Bobonaru, maibè rezultadu teste ohin dader, rezulta alin feto ne’e hetan pozetivu COVID-19, ami sira ne’e la iha fali, Matebian nia fen nia imunidade durante fulan rua ikus ne’e, menus tamba hanoin nia laen’’ haktuir fontes ida ne’ebè lakohi atu publika nia naran.

Ho rezultadu teste ne’e, halo Inan-faluk ne’ebè hamutuk ho nia oan na’in tolu, lakon nia Aman esperansa, labele partisipa iha serimònia fùnebre no hasoru malu de’it iha Aeroportu, Comoro, Dili.

Bainhira tun husi aviaun sei mai vizita uma matebian iha Luru-mata no liu oras balun, transporta matebian ba kedas Bobonaru, tuir planu, Matebian sei ba hakoin iha Munisìpiu Bobonaru, iha loron 31 Fulan ida ne’e.

Jornalista : Dores.

Editòr : Arménio.

Keta haluha, prevene moras COVID-19 liu husi iha uma de’it,  Fase liman bebeik , uja máskara, distansiamentu sosiál no halo tuir regra sira hotu ne’ebé bele hado’ok ita husi moras hada’et COVID-19.