KFP Diskute Involvimentu Ema Ho difisiénsia Iha Administrasaun Públika

Jornalísta : Amar Belo //

G-RTV.Com (Dili) : Komissaun Funsaun Públika (KFP) realiza Workshop ho tipu diskusaun meza redonda relasiona ho peskiza ema ho difisiénsia iha Administrasaun Públika.

Tuir prezidente komissaun funsaun públika, objetivu prinsipál iha meza redonda ne’e atu fahe rezultadu peskiza ne’ebé KFP hamutuk ema ho difisiénsia sira iha administrasaun públika

“Ohin KFP hala’o diskusaun iha meza redonda konabá rezultadu peskiza ema ho difisiénsia iha administrasaun públika, ida ne’e mai ho hanoin ida atu oinsa mak prinsípiu inkluzaun, igualidade jenéru ne’e bele implementa iha funsaun públika atu fó espasu no assensibilidade ba partisipasaun plena tomak ba sidadaun hotu-hotu la ho diskriminasaun ba kondisaun fízika, jéneru no situasaun sira seluk ne’ebé la korresponde ba ita nia prinsípiu ne’ebé konstituisaun hatur,” informa prezidente KFP, Faustino Cardoso ba jornalísta sira Iha Salaun Maubara Room, Timor Plaza Pissu 5, Kinta-Feira, 05/5/2022.

Relasiona ho assuntu inkluzaun sosiál, hanesan mós assuntu jéneru no ema ho difisiénsia mak nu’udar assuntu transversal no sai nu’udár sentru ida atu alkansa dezenvolvimentu nasionál (PEDN) ba tinan 2011-2030, nune’e funsau públika rekoñese ninia papél importante hodi aborda iha polítika no programa asuntu ema ho difisiensia atu asegura sira nia kontribuisaun no partisipasaun  ativa iha dezenvolvimentu estadu no nasaun Timor-leste no atu asegura ema ho difisiénsia sira nia partisipasaun ativa, maka KFP hatur ona assuntu inkluzaun nudar prioridade politíka ás ida , além de preoridade sira seluk iha âmbitu reforma administrasaun públika Timor Leste, tenik Faustino.

Iha tempu hanesan, difisiénsia-ain, Dominggos Henrique Maia nu’udár funsionáriu públiku MSSI haktuir “ Esperénsia ne’ebé ha’u serbisu iha funsionáriu públiku iha MSSI hahu tinan 2008-2013 nu’udár funsionáriu kontratadu hafoin iha 2014 wainhira ministériu loke vaga konkorsu públiku ba funsionáriu permanente mos ha’u konkore no ikus selesionadu, ida ne’e hatudu katak ema ho difisiénsia mós bele kontribui ba prossesu serbisu iha administrasaun públika nian, dala barak ema hare de’it ami ne’e difisiénsia maibé la hare ba ami nia kapasidade no koñesimentu,” Haktuir Dominggos.

Nia afirma difikuldade ba sira (Difisiénsia) infrenta mak prossesu rekrutamentu ba kritéria ne’ebé hare bá saúde no fíziku inklui infrastutura.

Rezultadu xave husi peskiza refere inklui identifikasaun dezafius barreira no rekomendasaun lubuk ida atu oinsa bele hatan ba nessesidade maluk funsionáriu sira ho difisiensia iha administrasaun públika.

Entretantu, diskusaun ne’e sei konvida entidade assosiasaun ema ho difisiénsia sira hanesan ADTL, RHTO, UN WOMEN, REDE FETO, ADMTL no liñas ministeriais sira, ONG’s hodi rona hanoin no ideas sira hodi akumula no sai hanesan preoridade politika ida ba KFP hodi bele implementa iha instituisaun estadu hotu.

Avaliasaun bá ema ho difisiénsia refere realiza ona iha tinan 2019 iha territóriu nasionál, involve funsionáriu hamutuk na’in 166 kompostu husi feto nain 44 no mane na’in 122, no funsionáriu ho difisiensia ema nain 44 husi totál respondente.

(REMATA).