KI Offisialmente Lansa Prémiu Max Sthal, Grigorio Apresia

 Jornalista : Amar Belo //

G-RTV.Com (Dili) : Konsellu Imprensa (KI) Timor Leste  offisialmente lansa premiu foun ho naran Prémiu Max Sthal ho kategoria Kategoria Dokumentariu Diak Liu Ba Asuntu Direitu Umanu Hanesan Premiu Sira Seluk Nebe Antes Nee Atribui Ona Ba Jornalista Mellor Sira.

Prezidente KI  hateten prémiu ne’e nu’udár ónra no apresiasaun ba jornalista naran boot, Max Stahl ne’ebé kontribui ona ba luta libertasaun nasionál ba timor leste nia ukun rasik-an liu husi missaun lulik jornalízmu iha passadu,

“Desizaun ba premiu foun ho naran Max Stahl ne’e KI foti  liu husi plenária, ho ida ne’e ita dilibera kedas no públiku ona iha Jornal da Repúblika. Tan ne’e, ohin konsellu imprensa uza biban ida ne’e ho publikamente hato’o katak ita iha tan prémiu jornalízmu foun ba jornalista timor-oan sira atu esplika. Prémiu ne’e ita tau naran Max Stahl tamba saudozu Max Stahl nudar jornalista naran bo’ot ne’ebé kontribui ona ba timor leste nia independénsia liu husi ninia obra jornalístika iha tempu okupasaun militár indonézia nian,’’ Informa Prezidente KI, Virgilio Da Silva Guterres ba Jornalista sira iha salaun KI, Quintal bo’ot, Dili, Tersa-Feira,ohin, 21/06/2022.

Nia haktuir anunsia prémiu foun ne’e nu’udár oportunidade di’ák ba jornalísta, kanál mídia no assosiasaun jornalísta sira atu kontinua promove no defende direitu umanu iha paíz demokrátiku nomos promove nafatin liberdade imprensa no liberdade espresaun atu sidadun timor-oan hotu hotu ninia direitu ba informasaun, edukasaun, saúde, bee no saniamentu garantidu iha paíz foun ida nee.

Iha tempu hanesan, Prezidente Komité 12 de Novembru, Grigorio Saldanha mos apresia no orgullu ba konsellu imprensa tamba ho inisiativa ba premiu nee, “ Timor oan mak halo to’o mate ba ita nia rain ne’e hau sente bai-bain de’it, laiha obrigasaun, maibé ema estranzeiru ruma mak luta hanesan ita to’o mate, nia halo liu fali ita timor-oan tamba ne’e mak hodi komité nia naran hatoo agradese ba inisiativa  KI  no mos ba Prezidente Repúblika lori estadu nia naran konkorda no  atribui prémiu ba ita nia saudozu Max stahl” Espressa Gregorio.

Dezisaun hodi hamosu premiu foun Max Stahl ne’e bazeia ba lei komunikasaun sosial, artigu 44 no projetu rezolusaun parlamentu nasionál numeiru 83/V(4^a) institui premiu Max Stahl nu’udár rekoñesementu ba saudozu Max Stahl nia luta ba libertasaun nasionál liu husi nia obra jornalístiku sira.

KI anunsia liu husi ninia plenária foin lalais ne’e halo ona diliberasaun ho númeru 07/2022  iha loron 06 fulan Maiu hodi anunsia prémiu jornalízmu foun ho naran prémiu Max Stahl ho kategoria dokumentáriu di’ák liu ba assuntu direitu umanu hanesan prémiu sira seluk ne’ebé antes ne’e atribui ona ba jornalísta mellor sira.

Saudozu Max Sthal hanesan jornalísta estranjériu ne’ebé koñesidu ho publikasaun akontesimentu 12 Novembru 1991 iha santa krúz, Dili. Obra refere konsege loke mundu nia matan konabá kazu Timor ne’ebé luta atu hakarak ukun-rasik-án.

To’o ukun-án, Max Sthal kontinua nia servisu iha area jornalízmu dokumentáriu nian no estadu fó kondekarasaun no rekoñesimentu oi-oin ba saudozu, ikus liu saudozu hakotu ís iha loron 28/10/2022 iha Austrália.

 (Remata)

Editór : Arménio.