Konfirma Votu Maioria, Xanana-Horta Agradese

Jornalísta : Amar Belo //

G-RTV.com (Dili) : Eleisaun preziensiál 2022 volta daruak ne’ebé hala’o iha loron 19 Abríl 2022, rezulta tuir apuramentu final husi STAE, kandidatu prezidente ho númeru sorteiu 1, José Ramos-Horta, konfirma ho votu maioria, totál 397.145 (62.9%) hafoin kandidatu Francisco Guteres Lú Olo tuir  ho Votus 242.440 (37.91%).

Nune’e, liu husi konferensia imprensa, Prezidente Partidu Conselho Nacional para Reconstrução  de Timor (CNRT) Kayarala Xanana Gusmão hato’o sentimente kontente maibé la’ós tambá Ramos-Horta eleitu bá Prezidente, kontente ho fiar povu tomak liu husi ezerse sira nia direitu hodi fó votu konfiansa ba Ramos-Horta.

 “Ha’u la sente kontente tambá Horta manan maibé hau sente kontenti tebe-tebes tamba povu tomak  ezerse nia direitu hodi fo konfiansa ba Horta no kontente liu mak ita fo lisaun bo’ot ida mak estabilidade no la ho violénsia iha elisaun ne’e.” Deklara  Lider karismatiku Xanana Gusmão ba jornalista sira iha sede kandidatura Jose Ramos-Horta, Aimutin, Dili, Kinta Feira Ohin, 21/04/2022.

Nia agradese ba povu tomak liu-liu juventude sira ne’ebé hatudu  duni sira nia maturnidade iha tempu eleisaun tamba hadomi rai no povu ida ne’e nune’e Xanana halo apelu.

”Ha’u nafatin apelu bot teb-tebes ba jóvem hotu-hotu atu lalika rona tun rona sa’e hodi estraga malu para hahu iha loron elisaun ne’ebé la’o ho kapás, estabilidade no páz ne’e bele kontinua nafatin hodi fo fatin ba dezenvolve ita nia rai  maske iha dezafius maibé dezafius ne’e lasai todan bainhira iha páz, iha domin, iha damen iha ita nia rai ”. tenik Xanana.

Iha tempu hanesan, Prezidente eleitu 2022-2027, Jose Ramos-Horta mós afirma, “ha’u agradese bo’ot ba Maun Bo’ot Xanana no partidu CNRT tomak, líder partidu politiku, movimentu, grupu arte-marsiál, arte rituál, assosiasaun, profisionais, asosiasaun akadémiku universitariu no povu tomak iha rai ida ne’e bele fo konfiansa no apoiu tomak mai ha’u sai Prezidente eleitu, ” Deklara Horta.

Nia esklarese liu tan, iha tinan liman mai sei servisu hamutuk ho Kay Rala Xanana Gusmão, líder nasionál no partidu polítiku sira hodi haklean no hametin instituisaun demokrátiku iha rai ida nee.

“Ne’e duni tinan lima mai ne’e prezidente nia kna’ar sei buka serbisu metin ho maun bo’ot Kay Rarala Xanana Gusmão, líder nasionál, partidu polítiku iha parlamentu, grupu arte ritual no arte marsiál, autoridade suku no aldeia, univesitáriu no sektor privadu sira para oinsá ita bele hakmatek liu tan, haklean dame iha rai ida ne’e ,haklean hametin ita nia instituisaun demokrátiku.” Deklara Premiadu Nóbel bá Páz.

Tuir planu, bainhira CNE halo apuramentu nasionál, sei haruka bá Tribunál Rekursu hodi konfirma, nune’e iha loron 20 Maiu tinan ne’e Prezidente eleitu sei simu posse.

(REMATA).