La Iha Inimigu, Horta Promete Sei Halo Diáologu Ho FRETILIN, Ermera Hatudu Simpatia

Jornalísta : Arménio //

G-RTV.com (Ermera) : Premiadu Nóbel bá Páz, José Ramos-Horta nu’udár mós kandidatu Prezidente Repúblika 2022-2027, kontinua hala’o nia atividade kampaña eleitorál iha munisípiu Ermera, Sexta ne’e.

Iha komísiu polítiku, kandidatu ho númeru sorteiu 14, kontinua afirma konabá diálogu nasionál liu-liu sei halo diálogu ho partidu ne’ebé indijita nia ba kandidatu no partidu sira ne’ebé atualmente hetan asentuasaun iha Parlamentu Nasionál (PN) inklui partidu FRETILIN.

‘’Bainhira eleitu, ha’u sei konsulta uluk ho Xanana, estrutura partidu CNRT no partidu sira seluk iha PN inklui sira ne’ebé la iha asentuasaun iha PN, rona opiniaun, oinsá ita atu bá oin, ba ha’u la iha inimigu’’, deklara kandidatu José Ramos-Horta iha komísiu kampaña ne’ebé halao iha Gleno-Villa (Ermera), 11/03/2022.

Iha partisipante kampaña ne’ebé partisipa máxima husi komunidade, militante CNRT, simpatizante hamutuk rihun resin nia oin, eis-prezidente repúblika (PR) 2007-2012, hatutan tan, nu’udár PR bele influénsia polítika guvernu atu prioritija agrikultura.

‘’Bele influénsia polítika guvernu atu prioritiza agrikultura inklui kafé, ita bele aumenta liu tan kafé iha Timor Leste, ita bele proteje folin kafé nian’’, hatutan Horta.

Nia mós sei halo polítika ida, atu tau matan ba kosok-oan sira no inan sira atu nune’e bele kontribui ba hamenus kiak iha Timor.

‘’Tau matan didiak ba kosok oan sira no inan-feton sira hotu, labele iha violénsia iha uma, hanoin ho ema difisiénsia sira, atu tinan lima mai, bele hatun kiak iha Timor’’, Dehan Eis-Primeiru Ministru ne’e.

Tuir observasaun, eleitór sira hatudu nia simpatia maka’as ba líder nasionál na’in rua, Ramos Horta no Kay Rala Xanana Gusmão, nu’udár prezidente partidu CNRT ne’ebé sempre akompaña malu iha atividade polítiku iha territóriu nasionál.

Entretantu, kampaña ne’e supreviziona husi CNE inklui observadór nasionál no internasionál, hetan mós seguransa husi PNTL munisípiu, no tuir oráriu, kampaña bá kandidatu refere sei kontinua ba munisípiu REAOA-Oecusse. (REMATA).