G-NEWS (DILI) – Relasiona ho sosiedade no públiku ninia intrepretasaun katak, Greater sunrise sei fó ameasa ba Timor Leste iha futuru bainhira Estadu Timor la iha vontade atu prioritiza.
Kinta-Feira (16032023), ba G-News, Peskizador Lao Hamutuk Celestino Gusmão esplika, Projetu espesífiku Greater sunrise la’os vontade Governu nian, maibé liu-liu tanba seidauk iha Estadu Independente no kredivel ne’ebé kreditór ka investor sira atu fiar no investe.
Tuir Nia, Australia no Kompanha sira mós interese iha ne’ebá, tanba Kompanha sira hakarak maximiza benefísiu ba sira husi investimentu ne’ebé sira halo, nune’e presiza iha Estadu independente ne’ebé kredivel, no la’os promovidu hosi setór ne’ebé envolve iha projetu.
“Kuandu mais ita diskute assuntu estrativas, lakon espasu atu diskute no dezena Politika diversifikasaun ne’ebé produtivu no Sustentavel”, tenik Celestino Gusmão.
Kona-ba ameasas ba futuru Greater Sunrise, Celestino Gusmão informa tán, Se laiha investor ne’ebé atu investe iha Tasi Mane, tanba ne’e Governante sira kontinua uza Osan husi fundu Petrolíferu ba Tasi Mane – kuantu mais uza osan ba projetu bo’ot ne’ebé nian benefísiu duvidozu, kuensekuênsia mak Timor Leste sei lakon leet de’it, no setór produtivu no rekursu umanu kontinua la hetan oportunidade finansial atu dezenvolve an.
“Se ita kontinua la produs Greater sunrise, karik iha futuru laiha ema mak interese atu investe no produs, ho fatór barak inklui investór sira subtitui sira nia prioridade hosi industria fosil ba green energy ne’ebé renovável no mos liu. Ekipamentu sira iha plataforma upstream no downstream bele karun liu, la enkoraja investór atu investe”, nia fó sasin.
Objetivo Estadu nian atu fornese servisu esensial no kualidade ba sidadaun sira, atu hari’i rezilênsia popular no hari’i aliserse ekonómiku ida diversifikadu no sustentável. Agora daudaun Timor Leste nia fundu Petrolíferu dollares Amerikanu biliaun 17. Alende investe hela iha merkadu finanseiru Internasionál maibé Timor Leste bele dezena Polítika diversikasaun hodi investe iha ita nia ekonómia nasionál – bele liuhosi maneira demokrátika liuhosi Parlamentu Nasionál, no diskute viabilidade antes deside oinsa atu implementa.
Peskizador ne’e salienta liu tan, Fundu petróliu oituan ne’ebé Timor Leste iha, agora la’os sai de’it oportunidade ba elite no ema riku sira, maibé tenke sai oportunidade atu hari’i rezilênsia popular no hari’i aliserse ekonómiku ida diversifikadu no Sustentável.
Jornalista : Ekipa G-News
Editór Testu : Amito Qonusere Araújo
loading="lazy" />