G-NEWS (DILI) – Povu Timor Leste fó parabéns ba Instituisaun PNTL ne’ebé selebra ninia aniversáriu ba dala-23.
Ho ezisténsia PNTL ne’e, sidadaun hotu-hotu iha esperansa ba PNTL atu kontinua sai parseiru diak ba povu tomak, hodi hala’o kna’ar ho responsábilidade tuir Lei no Ordem.
Sidadaun ida Agusto de Jesus Belo ba G-News, iha serimónia Aniversáriu PNTL nian iha Kuartél-Jerál UEP Bairo-Pite, Segunda-Feira (27032023) informa katak, Instituisaun PNTL tenke sai instituisaun ne’ebé neútru no independente, labele hetan influensia polítika hosi poder politika no poder ekonómika hodi halakon integridade institusional ho profesionál.
“Parabéns ba PNTL, espera katak membru hotu-hotu sei kontinua kumpri lei no ordem ho profesional”, tenik Nia.
Iha parte seluk, Armando Pires, hanesan juventude Bairopite ne’ebé partisipa serimónia, fó ninia observasaun jerál ba servisu membru PNTL nian durante ne’e.
“Durante ne’e Ha’u haree membru barak mak nakar, maibé ita haree ninia prosesu ne’e hanesan bain-bain. Ita kompara ho membru F-FDTL, membru forsa ne’e kuandu sala ruma, sira nia boot foti kedan asaun, no halo ida ne’e sira tauk”, Armando afirma.
Komandante-Jerál PNTL Komisáriu Jerál Henrique da Costa husu ba membru tomak atu labele sai inimigu ba povu, no tenke prevene envolve iha atividade organizasaun Partidu polítiku.
Aniversáriu PNTL ba dala 23, partisipa hosi Prezidente Repúblika José Ramos Horta, Prezidente Parlamentu Nasionál, Prezidente Tribunal Rekursu, membru Governu, korpu diplomátiku no konvidadus Internasionál sira.
Jornalista : Ekipa G-News
Editór Testu : Amito Qonusere Araújo
loading="lazy" />