G-RTV.com (DILI) : Relasiona ho informasaun ne’ebé oras ne’e espalla iha públiku konabá Tenente Jenerál Lere-Anan Timur (LAT) atu kandidata nia-an bá Prezidente Repúblika (PR) husi períodu tinan 2022-2027, nune’e akademista husi Institute Of Bussines (IOB) konsidera la iha inplikasaun bá situasaun FALINTIL-Forsa Defesa Timor Leste (F-FDTL).
‘’Ema ne’e bele muda, maibé instituisaun ne’e nafatin, nune’e situsaun agora, ha’u la haree nia inplikasaun bo’ot, bainhira Tenente Jenerál Lere sai atu kandidata-an ba PR’’. Haktenik Reitór IOB, Dr. Pedro Ximenes iha nia kna’ar fatin, foin lalais ne’e.
Nia reforsa tan, tinan 20 ona, presija mudansa iha instituisaun F-FDTL nune’e tempu ona atu entrega bá jerasaun tuir mai.
‘’Ha’u haree katak Instituisaun liu ona tinan 20, tempu ne’ebé mak naruk, nune’e tempu ona atu Tenente Jenerál Lere Anan Timur husik nia fiar bá jerasaun tuir mai’’. Reforsa nia.
Fontes ne’e esplika liu tan, F-FDTL nia lideransa ne’ebé tuir jerasaun Lere preparadu ona tambá labele haree instituisaun defeza ne’e husi ema ida.
‘’F-FDTL preparadu ona, tambá iha lideransa tuir jerasaun Tenente Jenerál Lere preparadu no ita labele haree instituisaun F-FDTL ne’e husi ema ida, maibé haree bá nia organizasaun no sistema atu hametin no habo’ot liu tan’’. Fontes ne’e esplika.
Bainhira hatan konabá rekézitus sira, akademista ne’e prefere katak presija iha rekézitu mínimu hanesan iha esperénsia servisu, kualifikasaun akadémika, kapasidade di’ák, psikolojia di’ák, no iha saúde ne’ebé la impede atu avansa.
Entertantu, Kandidatu Lere-Anan Timur iha semana balun liu bá, klarifika, Nia prontu atu kandidata-an bá PR no Tenente Jenerál ne’e sei konfirma ho líder nasionál Kay-Rala Xanana Gusmão konabá nia kandidatura.
Jornalista : Arménio.
loading="lazy" />