Liña Frente PA Alas hahu simu vasina Astrazaneka.

G-RTV News (17/04/2021): Liña frente Postu Administrativu (PA) Alas, Munisípiu Manufahi hahu simu vasina astrazaneka ba faze dahuluk nian.

Administradór PA Alas Leopoldo Barreto, haktuir liu husi via-telefone katak, hafoin hala’o lansamentu  iha Munisípiu ba programa vasinasaun nian, loron tuir mai (16/04), Postu Alas hala’o kedas atividade vasinasaun.

‘’Antes ne’e, ita hala’o ona sosializasaun ba programa vasinasaun, nune’e bainhira nível munisípiu lansa, loron tuir mai, ami hala’o kedas iha Alas, hahu sexta feira no sei kontinua ba segunda feira’’ haktuir Administradór Postu.

Leopoldo esklarese liu tan, ema sira ne’ebé konsideradu hanesan liña frente iha postu refere mak funsionáriu administrasaun postu, PNTL, pessoál sentru saúde,no autoriedade lokál.

‘’Ema ne’ebé konsideradu hanesan linã frente ba kombate Covid-19, iha postu sira, tuir informsaun ne’ebé antes ne’e ami simu katak, funsionáriu administrasaun postu, membru PNTL, pessoál sentru saúde no autoriedade lokál’’ esklarese Nia.

Bainhira simu vasina astrazaneka, líder postu ne’e, klarifika katak, la iha sinál negativa ruma durante prossesu la’o ba benefisiáriu sira ne’ebé simu ona.

‘’Ami sira ne’ebé ohin simu ba loron dahuluk, seidauk iha sinál negativa ruma’’. espresa fontes ne’e.

Konabá númeru benefisiáriu liña frente iha Postu Alas, líder autoriedade postu ne’e,  informa katak ‘’Ema na’in 88 mak sei simu, ba loron dahuluk, benefisiáriu sira hamutuk ema na’in 48 mak simu, kompstu husi mane 32 no feto 16’’. Líder ne’e informa.

Tuir planu ne’ebé planeia, Administradór sei hamutuk ho liña frente sira, tun ba baze atu hala’o sosializasaun ba komunidade sira iha postu refere, hodi reforsa programa guvernu ba vasinasaun astrazaneka ne’ebé sei mai iha fulan balun ho objetivu atu kombate surtu Covid-19 iha Timor Leste.

Jornalsita : Arménio